პერსონალური სახელმწიფო დაცვით სარგებლობა, სავარაუდოდ, პარლამენტის ყოფილ თავმჯდომარესაც შეეზღუდება. დღეს მოქმედი რეგლამენტით, პარლამენტის ყოფილი თავმჯდომარე უზრუნველყოფილია სახელმწიფო დაცვით ახალი მოწვევის პარლამენტის უფლებამოსილების ვადით.
მთავრობის ინიციატივით “სახელმწიფო დაცვის სპეციალური სამსახურის შესახებ“ კანონში დაგეგმილი ცვლილებების მიხედვით კი, პარლამენტის თავმჯდომარეს პერსონალური სახელმწიფო დაცვა უფლებამოსილების გასვლიდან ერთი წლის ვადით შეუნარჩუნდება.
ამასთან, პროექტის მიხედვით, ყოფილ უმაღლესი სახელმწიფო თანამდებობის პირებს სახელმწიფო დაცვა იმ შემთხვევაში შეუნარჩუნდებათ, თუკი მათ სიცოცხლესა და ჯანმრთელობას საფრთხე ემუქრება. ამაზე გადაწყვეტილება მთავრობამ უნდა მიიღოს.
კანონპროექტი სახელმწიფო დაცვის სპეციალურმა სამსახურმა მოამზადა და ის განსახილველად მთავრობამ პარლამენტს 5 აგვისტოს წარუდგინა.
სახელმწიფო დაცვის სპეციალურმა სამსახურის ინიციატივით, უქმდება „სახელმწიფო დაცვის სპეციალური სამსახურის შესახებ“ კანონში არსებული ჩანაწერი, რომლის მიხედვით, საქართველოს პრეზიდენტს თანამდებობაზე არჩევის დღიდან სიცოცხლის ბოლომდე ენიშნება პერსონალური დაცვა სამუშაო ადგილას, მუდმივ და დროებით ადგილსამყოფელში. შესაბამისად, პრეზიდენტს სიცოცხლის ბოლომდე პერსონალური დაცვა აღარ ეყოლება.