არ მგონია, დავით ბაქრაძეს არ ახსოვდეს, 2008 წელს რა რეზოლუციას დაუჭირა მხარი მისმა სახელისუფლებო გუნდმა, – განაცხადა „ტვ პირველის“ ეთერში საპარლამენტო უმრავლესობის ლიდერმა არჩილ თალაკვაძემ.
არჩილ თალაკვაძის თქმით, ნაციონალური მოძრაობის ყოფილმა სახელისუფლებო გუნდმა უნდა განმარტოს, რატომ დაუჭირა მხარი 2008 წლის ოქტომბერში ევროპის საბჭოს საპარლამენტო ასამბლეის რეზოლუციას, რომლის მეხუთე პუნქტში ნათქვამია, რომ „ქართველი სამხედროების მიერ ცხინვალის გაუფრთხილებლად დაბომბვის დაწყებამ 2008 წლის 7 აგვისტოს გამოიწვია ესკალაციის ახალი დონე, კერძოდ კი ღია და სრულმასშტაბიანი ომი“.
„ევროსაბჭოს საპარლამენტო ასამბლეის რეზოლუციას ხელს აწერს „ნაციონალური მოძრაობის“ მაშინდელი სახელისუფლებო გუნდი და დავით ბაქრაძე უდავოდ, საქმის კურსში იყო ამასთან დაკავშირებით, რაზეც დღეს განაცხადა, რომ არ ახსოვს. მე არ მგონია, მას არ ახსოვდეს, 2008 წელს რა რეზოლუციას დაუჭირა მხარი მისმა სახელისუფლებო გუნდმა, ამიტომ, ამ ყველაფერს სჯობს, რომ მათ გასცენ პირდაპირ ეთერში პასუხები“, – განაცხადა თალაკვაძემ.
2008 წელს ევროსაბჭოს საპარლამენტო ასამბლეის დელეგაციის შემადგენლობაში მაშინდელი სახელისუფლებო გუნდიდან იყვნენ მიხეილ მაჭავარიანი, ჩიორა თაქთაქიშვილი, გოკა გაბაშვილი, აკაკი მინაშვილი, ლაშა ჟვანია, გიორგი კანდელაკი და დავით დარჩიაშვილი.