პარლამენტის ვიცე-სპიკერი “დემოკრატიული მოძრაობის” თავმჯდომარე ნინო ბურჯანაძეს პასუხობს.
“ნინო ბურჯანაძის გამოსვლა მოვისმინე. თურმე, რეზოლუციის განხილვა იმიტომ მინდა, რომ ყურადღება გადამაქვს “ოცნებიდან” ნაცმოძრაობაზე. აი, სადამდე მიჰყავს პოლიტიკურ დეგრადაციას გასული საუკუნის პოლიტიკოსი.
ქალბატონო ნინო, ძვირფასო ნინო, თქვენ რეალურ პოლიტიკაში დიდიხანია არა ხართ. ხან გაზაფხულზე და ხან შემოდგომაზე ფრაგმენტულად ტელევიზიის ეკრანზე თუ გამოჩნდებით, ესაა თქვენთვის პოლიტიკა და იმაზე გაბრაზებული, რომ რეალურ პოლიტიკაში აღარ ხართ, ტელეეკრანიდან მთელს სამყაროს უბრაზდებით.
ახლა, ეტყობა თქვენი ვირტუალური პოლიტიკისთვის ახალი სატელევიზიო სეზონი დაიწყო. საუბრობთ ჩვენზე, ჩემზე, ბრაზობთ, მილიონჯერ იყავით პარლამენტში და ვერ მპატიობთ, რომ ერთხელ მეც მიწევს იქ ყოფნა. ჩააქრეთ ფარები, ქალბატონო ნინო, არავის არ ეშინია თქვენი ცილისწამების. სატელიტები, სადენები, გადამცემი ხაზები და ა.შ. მოიკითხეთ თქვენსკენ. ჩემთან ამას ნუ ეძებთ!
ისე, რაც თავი მახსოვს, სატელიტი კი არა, ყველა ხელისუფლებასთან პირდაპირ მიჯაჭვული პოლიტიკოსი იყავით. ჯერ შევარდნაძეს მსახურობდით, მერე- ჟვანიას, შემდეგ- სააკაშვილს და ბევრი იღვაწეთ, რომ ბიძინა ივანიშვილის მსახურიც გამხდარიყავით, მაგრამ არ გამოგივიდათ! და ახლა ამ წარუმატებელი მცდელობით გაბრაზებული, ივანიშვილის სატელიტობას მე მაბრალებთ. უფრო მეცინება თქვენზე, ვიდრე ვბრაზდები”– წერს ირმა ინაშვილი ფეისბუქში.