რუსთაველის თეატრში სალომე ზურაბიშვილი მხარდაჭერებს შეხვდა. შეხვედრაზე სიტყვით გამოვიდა „ქართული ოცნების“ პარტიის გენერალური მდივანი კახა კალაძე, რომელმაც ამომრჩევლებს კიდევ ერთხელ მოუწოდა პრეზიდენტის არჩევისას სწორი არჩევანი გააკეთონ.
კალაძემ სალომე ზურაბიშვილის მიმართ მიზანმიმართულ პროვაკაციებზეც გაამახვილა ყურადღება და აღნიშნა, რომ საარჩევნო კამპანია, რომელიც მიმდინარეობს ოპონენტების მხრიდან არის შეურაცხმყოფელი.
კალაძემ კიდევ ერთხელ განმარტა, რატომ დაუჭირა მას მხარი „ქართულმა ოცნებამ“.
„მინდა, მოგახსენოთ გადაწყვეტილება, რომელიც პარტია „ქართულმა ოცნებამ“ მიიღო, ჩვენთვის ერთ-ერთი მთავარი მნიშვნელოვანი მიმართულება ის იყო, რომ ქალბატონი სალომე გახლავთ დამოუკიდებელი კანდიდატი და ეს არ არის მთავარი მიმართულება, თუმცა იყო ერთ-ერთი პრინციპული თემა როცა ჩვენ ვმსჯელობდით.
მინდა გითხრათ, რომ ქალბატონ სალომეს მხარდაჭერით ჩვენ ვაკეთებთ არჩევანს და ვირჩევთ ტრადიციულ ევროპას, ნაცვლად ფაშისტურ-ბოლშევიკური მისწრაფებებისა. ჩვენ ვირჩევთ მშვიდობიან განვითარებას, ნაცვლად დაპირისპირებისა. ჩვენ ვირჩევთ ჩვენი დიდი წინაპრების გზას, ნაცვლად ყალბი ღირებულებისა. ჩვენ ვირჩევთ პრინციპულობას, ნაცვლად სიყალბისა და ჩვენ ვირჩევთ თავისუფლებას, ნაცვლად ავტოკრატიისა.
ჩვენ ვირჩევთ პრეზიდენტს, რომელმაც ხელი უნდა შეუწყოს საზოგადოების და ქვეყნის გაერთიანებას. ხელი უნდა შეუწყოს ჩენსმშვიდობიან, სტაბილურ განვითარებას მხარი დაუჭიროს ქართული იდენტობის გაძლიერებას და ამ გამოკვეთილი იდენტობით დიდ ევროპულ ოჯახში ჩვენი ქვეყნისთვის კუთვნილი ადგილის დამკვიდრებას”, – განაცხადა კახა კალაძემ.