პარლამენტის ვიცე-სპიკერი ირმა ინაშვილი მისი ყოფილი თანაგუნადელის, ნატო ჩხეიძის მიერ ფეისბუქზე გამოქვეყნებულ პოსტს ეხმიანება, რომელშიც პარტიის შიდა თათბირებზე იყო საუბარი და რომელიც სოციალურ ქსელში ქილიკის საგნად იქცა.
“ყველა რაღაცას იხსენებს და მეც გამახსენდა…მამაჩემი, რომელიც პროფესიით ბავშვთა ქირურგი იყო, მასწავლიდა: იმის მიუხედავად, რომ სამყარო ჭრელია, ადამიანთა ნაწილი შენთან ურთიერთობისას შეცდომებს დაუშვებს, 100- დან 90-ი ნიღბით მოვა და ხაფანგს დაგიგებს, გეტკინება გული და იტყვი, რომ არავის არ უნდა ენდო, მაინც ნუ დაკარგავ რწმენას, რომ არსებობენ წესიერი ადამიანები, რომლებსაც დიახ, უნდა ენდო და მიენდო… თუ ამ რწმენას დაკარგავ და ყველას ეჭვის თვალით დაუწყებ ყურებას, დაინგრევი. მარტო დარჩები.
სადაც მომავალში იმუშავებ, სადაც დაიხარჯები, როგორც პროფესიონალი, სადაც შექმნი შენს წრეს, პატივი ეცი ყველას, ვინც ამ წრეში და წრის მიღმა ტრიალებდა. თუ დატოვებ შენს ძველ სივრცეს, არასდროს გააკრიტიკო ძველები- ახლებთან, სამუდამოდ დაიმარხე მეხსიერებასა და გულში, რაც იქ თქმულა, რასაც ერთად აშენებდით. დაიწყე ნულიდან. დაიწყე სუფთა გულით და სუფთა მეხსიერებით. ჩემი 48 წლიანი ცხოვრების მანძილზე ეს მარტივი დარიგება ბევრჯერ გამომადგა.
P.S. როცა დრო და განწყობა მექნება, პერიოდულად გაგიზიარებთ სხვა შეგონებებსაც, რამაც ჩემზე კვალი დატოვა.”– წერს ირმა ინაშვილი ფეისბუქში.