ექსპერტ მამუკა არეშიძის განცხადებით გარკვეული პოლიტიკური ძალა მალხაზ მაჩალიკაშვილისა და ზაზა სარალიძის თემის გამოყენებით ქვეყანაში გარკვეული არეულობის მოწყობას გეგმავდა.
როგორც არეშიძემ “პრაიტაიმის” პრესკლუბში გამართულ პრესკონფერენციაზე განაცხადა, პოლიტიკური ძალის სცენარის თანახმად, უნდა მომხდარიყო აფეთება და ეს აფეთქება მსხვერპლით უნდა დასრულებულიყო.
“არჩევნების წინ საქართველოში ყოველთვის ვრცელდება ინფორმაციები დესტაბილიზაციაზე. ხან აქვს ამ ინფორმაციას საფუძველი, ხან არა. სამწუხაროდ, ამ შემთხვევაში ამ ინფორმაციას გარკვეული საფუძველი აქვს და არა მხოლოდ დღევანდელი გადმოსახედიდან. როდესაც მალხაზ მაჩალიკაშვილმა და ზაზა სარალიძემ რუსთაველის გამზირზე კარვები გაშალეს, ჩემთვის მაშინვე გახდა ცნობილი, რომ ამ ორი ადამიანის უბედურების გამოყენებას გარკვეული პოლიტიკური ძალა აპირებდა. მე გვარების დასახელებას არ დავიწყებ, მაგრამ ის, რომ არეულობის და დესტაბილიზაციის მცდელობა იყო აი ამ ორი უბედური მამის მდგომარეობით, ეს მაშინვე ჩემთვის ცნობილი იყო. კარვებთან დაკავშირებით იყო საუბარი ექსცესების მოწყობაზე, აფეთქება იქნებოდა ეს თუ სხვა იმისათვის, რომ ყოფილიყო მსხვერპლი და ამას მოჰყვებოდა შესაბამისი რეაგირება საზოგადოებისა, ანუ ქუჩაში ხალხის გამოყვანა… ახლა როგორც ინფორმაციები მომდის, ასეთი რამ არჩევნების კონტექსტში იგეგმება, თუ ოპოზიციისათვის სასურველი შედეგი არ დაიდება. ასეთი დეტალური ინფორმაცია თუ არის, ხელისუფლებას მაქსიმალური ნაბიჯების გადადგმა მოეთხოვება, რომ ასეთი რამ აირიდოს. პროცესების ქუჩაში გადანაცვლებას არ გამოვრიცხავ, მაგრამ შინაგან საქმეთა მინისტრის განცხადება ორიენტირებული იყო იმაზე, რომ ექსცესები თავიდან იქნას არიდებული”, – განაცხადა მამუკა არეშიძემ.