საქართველოს პარლამენტის თავმჯდომარე ირაკლი კობახიძე, საპარლამენტო უმრავლესობის წევრებთან ერთად, „მთავარანგელოზ გაბრიელისა და პეტრე მოციქულის სახელობის ფონდის“ სარეაბილიტაციო ცენტრ „პეგასის“ მშენებლობის პრეზენტაციას დაესწრო.
„განსაკუთრებული ყურადღება უნდა დავუთმოთ აუტისტური სპექტრის მქონე ბავშვებს, ეს უნდა იყოს ჩვენთვის პრიორიტეტი – მათი სრული ინტეგრაცია განათლების სისტემაში, ზოგადად, საზოგადოებრივ ცხოვრებაში”,- ამის შესახებ ირაკლი კობახიძემ პრეზენტაციის შემდეგ ჟურნალისტებთან განაცხადა.
ამასთან, პარლამენტის თავმჯდომარემ ხაზგასმით აღნიშნა, რომ ძალიან მნიშვნელოვანია ამ საკითხთან დაკავშირებით, საზოგადოების სათანადო ინფორმირება.
„ძალიან მნიშვნელოვანია ასევე საზოგადოების სათანადოდ ინფორმირება ამ საკითხთან დაკავშირებით და ამისთვის ყველაფერი უნდა გაკეთდეს. ამაში უნდა იყოს ჩართული როგორც ხელისუფლება, ასევე, ეკლესია, ასევე, სამოქალაქო საზოგადოება, ბიზნესი, ბავშვების მშობლები და დღეს ვნახეთ ამისი ძალიან კარგი მაგალითი. ძალიან კარგია, რომ იწყება სარეაბილიტაციო ცენტრის მშენებლობა, რაც იქნება კიდევ ერთი ძალიან მნიშვნელოვანი წინ გადადგმული ნაბიჯი ამ მიმართულებით”,- განაცხადა ირაკლი კობახიძემ.
პარლამენტის პრესსამსახურის ინფორმაციით, საქართველოს პარლამენტის თავმჯდომარესა და დეპუტატებს ცენტრის მშენებლობაში გაწეული დახმარებისთვის მეგობრობის სიგელებიც გადაეცათ.
პრეზენტაციას საკანონმდებლო და აღმასრულებელი ხელისუფლების, დიპლომატიური კორპუსის, საერთაშორისო და არასამთავრობო ორგანიზაციების, ასევე, ბიზნესსექტორის წარმომადგენლები და სასულიერო პირები დაესწრნენ.
სარეაბილიტაციო ცენტრ „პეგასის“ მშენებლობა 2019 წელს დაიწყება და 2026 წელს დასრულდება.