„ევროპული საქართველოს“ საპრეზიდენტო კანდიდატი დავით ბაქრაძე აღიარებს, რომ „ნაციონალური მოძრაობის“ ხელისუფლების პერიოდში ირღვეოდა ადამიანების უფლებები. როგორც ბაქრაძემ ტელეკომპანია „იმედი”-ს გადაცემაში „რა დროს ძილია?!“ აღნიშნა, მაშინდელი ხელისუფლება ბევრად ჰუმანური უნდა ყოფილიყო.
ბაქრაძემ ასევე ისაუბრა „ევროპული საქართველოსა“ და „ნაციონალური მოძრაობის“ შორის გავლებულ პარალელებზე და ხაზი გაუსვა, რომ ეს ორი პარტია ერთმანეთისგან მკვეთრად განსხვავდება.
„მე არასდროს გავქცევივარ იმ პასუხისმგებლობას, რომელიც მოდის წარსულიდან, არც კარგს და არც ცუდს, მაგრამ დღეს „ევროპული საქართველო“ არის მკვეთრად განსხვავებული პარტია. ამას წინათ, თავად მიხეილ სააკაშვილმაც თქვა, არ ვიცი რატომ ეგონა, რომ ვინმეს ჰგონია, მე მისი კანდიდატი ვარ?! – მან მკაფიოდ თქვა, არ გეგონოთ რომ ბაქრაძეა ჩემი კანდიდატი, ჩემი კანდიდატი არის ვაშაძეო, რაშიც აბსოლუტურად ვეთანხმები.
დღეს მე არ ვარ „ნაციონალური მოძრაობის“ და მიხეილ სააკაშვილის კანდიდატი და აქამდე მოგვიყვანა ძალიან მნიშვნელოვანმა განსხვავებებმა, რომელიც უკვაშირდება წარსულსა და მომავალს.
2012 წელს როდესაც არჩევნები წავაგეთ მთავარი ემოცია, კითხვა რაც ჩემს თავთან მქონდა იყო ასეთი: – რა დავაშავეთ ასეთი, რამაც გადაფარა ყველა პოზიტივი? – ძალიან ბევრი ვიფიქრე და მივხვდი, მთავარი შეცდომა არის ის, რომ ჩვენ ვერ შევძელით შეცვლა როდესაც უნდა შევცვლილიყავით. კონკრეტულად გეტყვით, 2004 წელს საქართველოს სჭირდებოდა მკაცრი პოლიტიკა კრიმინალის წინააღმდეგ, 2008 წელს ეს პოლიტიკა საჭირო აღარ იყო, მაშინ ბევრად უფრო ჰუმანური და ბევრად უფრო მიმტევებელი უნდა ვყოფილიყავით.
ადამიანის უფლებები – პირველ რიგში ეს იყო ის, რამაც საზოგადოება განაწყო მაშინდელი ხელისუფლების წინააღმდეგ… იყო ადამიანის უფლებების დარღვევა“, – განაცხადა დავით ბაქრაძემ ოლგა ბაბლუანთან ინტერვიუში.