სალომე ზურაბიშვილი დავით ბაქრაძეს: ალბათ გაგიჭირდათ ჩემი საარჩევნო ბუკლეტის წაკითხვა

“როგორც ჩანს ჩემი ყველა ბუკლეტი ვერ წაიკითხეთ, ალბათ გაგიჭირდათ წაკითხვა, იქ ყველაფერი წერია რაც საჭიროა”, – ამის შესახებ პრეზიდენტობის დამოუკიდებელმა კანდიდატმა სალომე ზურაბიშვილმა “პირველი არხის” გადაცემა “არჩევნები 2018”-ში წინასაარჩევნო დებატების დროს,  დავით ბაქრაძის კითხვის საპასუხოდ განაცხადა.
პარტია “ევროპული საქართველოს” პრეზიდენტობის კანდიდატმა დავით ბაქრაძემ სალომე ზურაბიშვილის ბუკლეტი წარადგინა სტუდიაში და დაინტერესდა თუ რა არის სალომე ზურაბიშვილის დაპირება ქართველი ამომრჩევლისადმი. ბაქარაძე ამბობს, რომ აღნიშნულ ბუკლეტში არ არის საუბარი ხალხზე, ბაქრაძე მიიჩნევს, რომ პრეზიდენტი წინაპრების გამო კი არ უნდა გახდე, არამედ იმიტომ რომ ხალხს ემსახურო.
“თქვენ ამბობთ, რომ გაჭირვებულ ფენებზე იზრუნებთ, მაგრამ თქვენს ბუკლეტში წერია, რომ თქვენი წინაპრების საპატივსაცემოდ გახდებით პრეზიდენტი და აღნიშნულ ბუკლეტში არ არის საუბარი ხალხზე, პრეზიდენტი წინაპრების გამო კი არ უნდა გახდე, არამედ იმიტომ რომ ქართველ ხალხს ემსახურო. ჩემი კითხვა შემდეგში მდგომარეობს რა არის თქვენი დაპირება”,- განაცხადა დავით ბაქრაძემ.
შეკითხვის საპასუხოდ სალომე ზურაბიშვილმა აღნიშნა, რომ ბაქრაძის მიერ წარმოდგენილი ბუკლეტი საპროგრამო არაა და ამ ბუკლეტში მის, როგორც პრეზიდენტობის კანდიდატ პერსონაზეა ყურადღება გამახვილებული.
“ეს არის ერთ-ერთი ბუკლეტი, რომელშიც იყო ჩემი პიროვნული წარდგენა, რადგან პრეზიდენტი პიროვნულად იღებს მონაწილეობას არჩევნებში, ეს არ არის ჩემი საპროგრამო ბუკლეტი, როგორც ჩანს ჩემი ყველა ბუკლეტი ვერ წაიკითხეთ, ალბათ გაგიჭირდათ წაკითხვა, იქ ყველაფერი წერია რაც საჭიროა”,- მიმართა ზურაბიშვილმა ბაქრაძეს.