აუცილებლად ვიქნები ყველას პრეზიდენტი, რადგან საქართველოს მართლაც სჭირდება ზეპარტიული პრეზიდენტი, – ასე უპასუხა „ევროპული საქართველოს“ პრეზიდენტობის კანდიდატმა, დავით ბაქრაძემ პირველი არხის გადაცემა „დებატები 2018″-ის წამყვანის კითხვას, იქნება თუ არა გრიგოლ ვაშაძისა და სალომე ზურაბიშვილის პრეზიდენტი, რაშიც იგულისხმებიან ის სოციალური ჯგუფები, რომლებიც მათ უკან დგანან.
დავით ბაქრაძის განცხადებით, იმისათვის რომ ქვეყანაში პოლიტიკური ვითარება დამშვიდდეს, აუცილებელია წარსულზე საუბარს წერტილი დაესვას და მომავლისკენ იყოს ხედვა.
“ქვეყანას სჭირდება დამშვიდება და დაწყნარება, ამისათვის საჭიროა, რომ წერტილი დავუსვათ წარსულს და უნდა ვთქვათ, რომ პოლიტიკური დევნა და ანგარიშსწორება დასრულდა.
გავიდა ექვსი წელი, რომელიც სრულიად საკმარისი იყო სასჯელისთვისაც, ბრალის დამტკიცებისთვისაც, ამიტომ წარსული უნდა დავხუროთ. უნდა დავიცვათ მომავალი და ძალიან მკაფიოდ ვთქვათ, რომ მომავალში არ მოხდება არავის დევნა, დაპატიმრება და პრობლების შექმნა განსხვავებული პოლიტიკური მოსაზრების გამო. მე მიაჩნია, რომ ყველას პრეზიდენტის ფუნქცია ეს არის, რომ ადამიანებმა იგრძნონ თავი დაცულად და ქვეყანაში ერთხელ და სამუდამოდ დასრულდეს პოლიტიკური დევნა”– განაცხადა დავით ბაქრაძემ.