ნორიოს ტყეში, სამხედროებს შორის მომხდარი დაპირისპირების ფაქტზე, რომელსაც ერთი ადამიანის სიცოცხლე ემსხვერპლა, ერთ-ერთი ბრალდებულის, ირაკლი სამხარაძის საქმეზე ნაფიც მსაჯულთა სასამართლო იმსჯელებს.
რუსთავის საქალაქო სასამართლოში მოცემულ საქმეზე ნაფიც მსაჯულთა შერჩევის მიზნით სხდომა დღეს, 11:00 საათზეა ჩანიშნული. სხდომაზე სახელმწიფო სერვისების განვითარების სააგენტოდან შემთხვევითი შერჩევის პრინციპით შერჩეული 150 კანდიდატიდან 12 ძირითადი და არანაკლებ 2 სათადარიგო ნაფიცი მსაჯული შეირჩევა.
ირაკლი სამხარაძის მიმართ საქმე საქართველოს სისხლის სამართლის კოდექსის 117-ე მუხლის მე-2 ნაწილითაა (ჯანმრთელობის განზრახ მძიმე დაზიანება, რომელიც სახიფათოა სიცოცხლისთვის, რამაც გამოიწვია სიცოცხლის მოსპობა) აღძრული. საქმის მასალების მიხედვით, ირაკლი სამხარაძემ სიტყვიერი შეკამათების დროს, სერგო ჯიმშერაშვილს შურისძიების მოტივით, სახისა და თავის არეში მუშტების მრავალჯერადი დარტყმის შედეგად მიაყენა სიცოცხლისათვის სახიფათო, მძიმე ხარისხის ჯანმრთელობის დაზიანება. ბრალდებულის მიერ თავის არეში მიყენებული მძიმე დაზიანების შედეგად სერგო ჯიმშერაშვილი კომატოზურ მდგომარეობაში იყოფებოდა და მოგვიანებით გარდაიცვალა.
აღნიშნულ საქმეში კიდევ 4 ბრალდებული: გ. ბაზარაშვილი, შ. მეფარიძე, გ. თურაზაშვილი და ბ. რუსიეშვილი, რომელთა მიმართაც გამოძიება დანაშაულის შეუტყობინებლობის ბრალდებით სსკ-ის 376 მუხლით მიმდინარეობს და ისინი გირაოს სანაცვლოდ არიან გათავისუფლებული, ირაკლი სამხარაძეს კი აღკვეთის ღონისძიების სახედ პატიმრობა აქვს შეფარდებული.