ხადის ხეობაში სმითების ოჯახის მკვლელობაში ბრალდებული მალხაზ კობაურის ადვოკატი სასამართლო პროცესში ნაფიცი მსაჯულების მიწვევას ითხოვს. ის ამ მოთხოვნით სასამართლოს დღეს მიმართავს.
მცხეთის რაიონული სასამართლო დღეს მტკიცებულებების დასაშვებობის საკითხსაც განიხილავს. ადვოკატის ტკიცებით, კობაური უდანაშაულოა, რასაც მის მიერ წარდგენილი მტკიცებულებები ადასტურებს. დღევანდელი პროცესი დახურული იქნება, რადგან 9 ნოემბერს მალხაზ კობაურს ბრალი დაუმძიმდა.
პროკურატურამ ის ლორა სმითის გაუპატიურებასა და დამამძიმებელ გარემოებებში მის მკვლელობაში დაადანაშაულა. მოწმეები დღევანდელ სხდომაზე არ დაიკითხებიან. მათი გამოკითხვა 14 დღეში იგეგმება. ჩადენილი დანაშაული თექვსმეტიდან ოც წლამდე, ან უვადო თავისუფლების აღკვეთას ითვალისწინებს.
დაკავებული დანაშაულს არ აღიარებს.
7 ივლისს დუშეთის მუნიციპალიტეტში, ხადის ხეობაში საქართველოსა და აშშ-ის ორმაგი მოქალაქე ცოლ-ქმარი -1975 და 1976 წელს დაბადებული რაიან სმითი და მისი მეუღლე ლორა – დაღუპულები იპოვეს. მოგვიანებით იპოვეს მათი 4 წლის ბავშვის ცხედარიც. მათი მკვლელობის ბრალდებით 19 წლის მწყემსი მალხაზ კობაური დააკავეს.