ძალიან მნიშვნელოვანი იყო განცხადებები, რომელიც მოვისმინეთ ბიძინა ივანიშვილისგან, არამხოლოდ გუშინ, არამედ მთელი ამ ხნის განმავლობაში, რაც პოლიტიკაში დაბრუნების გადაწყვეტილება მიიღო, – ამის შესახებ ბიძინა ივანიშვილის გუშინდელ ინტერვიუსთან დაკავშირებით თბილისის მერმა, კახა კალაძემ განაცხადა.
რაც შეეხება პარტია „ქართული ოცნების“ თავმჯდომარის განცხადებას კვლევებზე, კალაძის თქმით, მან არჩევნების მეორე დღეს აღნიშნა, რომ კვლევები იყო პრობლემა.
„კვლევასთან დაკავშირებით, თუ გახსოვთ არჩევნების მეორე დღეს ჩემი ბრიფინგი, გავამახვილე ყურადღება ამაზე და ხაზი გავუსვი, რომ ეს იყო ჩვენი პრობლემა. ზოგადად, ძალიან მნიშვნელოვანი იყო განცხადებები, რომელიც მოვისმინეთ ბიძინა ივანიშვილისგან არამხოლოდ გუშინ, არამედ მთელი ამ ხნის განმავლობაში, როდესაც მან მიიღო გადაწყვეტილება პოლიტიკაში დაბრუნებასთან დაკავშირებით. ზოგადად, პრობლემები, რომელიც დღეს აწუხებს მოსახლეობას, ის ტკივილი და მძიმე საკითხები, ეს ყველაფერი გათვალისწინებულია, გარკვეული გადაწყვეტილებები უკვე მიღებულია კონკრეტულ თემებთან დაკავშირებით.
დაუღალავი მუშაობა არის საჭირო. ტემპი, რაც გვაქვს ეკონომიკური განვითარების თვალსაზრისით, კარგია, მაგრამ ამას არ უნდა დავჯერდეთ, პირიქით, მეტი უნდა ვიმუშაოთ, რომ გაძლიერდეს ეკონომიკური აღმავლობა და განვითარება ქვეყანაში, რათა კეთილდღეობა თითოეულმა მოქალაქემ იგრძნოს“, – განაცხადა კალაძემ.