არავის მივცემთ უფლებას, ვიღაც კრიმინალმა ატეროროს კი არა, შეურაცხყოფა მიაყენოს პოლიციელს, – ამის შესახებ საქართველოს შინაგან საქმეთა მინისტრმა გიორგი გახარიამ განაცხადა, რომელიც „ნაციონალური მოძრაობის“ სამეგრელო-ზემო სვანეთის კოორდინატორ, მურთაზ ზოდელავას განცხადებას გამოეხმაურა.
მურთაზ ზოდელავამ განაცხადა, რომ ხობის რაიონში, რამდენჯერმე ნასამართლევი პირი გ.პ. მათ მხარდამჭერებსა და პარტიის ლიდერებს ატერორებს. ამასთან, აღნიშნა, რომ ერთ-ერთმა ყოფილმა პოლიციელმა ფარულად ჩაწერა გ.პ.-ს მხრიდან პოლიციელზე ზეწოლა.
„ყოფილ და დღევანდელ პოლიციელს ვიცავდით და დავიცავთ. თუ მსგავსი რამ არსებობს, უნდა მიმართოს შესაბამის ორგანოებს განცხადებით და ჩვენ, როგორც ყოფილ, ასევე დღევანდელ თანამშრომლებსაც ბოლომდე დავიცავთ. მით უმეტეს, არავის მივცემთ უფლებას, ვიღაც კრიმინალმა ატეროროს კი არა, შეურაცხყოფა მიაყენოს პოლიციელს. ეს იყო ერთადერთი არჩევნები, სადაც ძალადობის შემთხვევები, პირველ ტურს ვგულისხმობ, მინიმუმამდე იყო დაყვანილი. 21 ადამიანზე არის დევნა დაწყებული. ყველაფერი ის, რაც ახლა ხდება საარჩევნო კონტექსტიდან გამომდინარე, გაურკვეველი განცხადებები, ხშირ შემთხვევაში ბრალდებები, რომლებსაც შემდგომ დასაბუთება არ მოჰყვება, ამას ყველაფერს სჭირდება სიწყნარე, სიმშვიდე, შესაბამისი საგამოძიებო ორგანოები და სასამართლო. ახლა მე რასაც ვამბობ, მხოლოდ იმ კონტექსტში, რომ ვიღაც კრიმინალი თურმე ყოფილ პოლიციელს ატერორებს. ეს ჩანაწერი უნდა მიიტანოს იქ, სადაც საჭიროა, ან მომიტანოს მე პირადად და ვინ ვის დაატეროტებს, მერე მაგას ვნახავთ“, – განაცხადა გიორგი გახარიამ.