საპრეზიდენტო კანდიდატი სალომე ზურაბიშვილი აცხადებს, რომ ის მმართველი გუნდისგან დამოუკიდებელი იქნება. ამის შესახებ მან გადაცემა “იმედის კვირასთან” ინტერვიუში განაცხადა.
სალომე ზურაბიშვილის თქმით, როდესაც მმართველ გუნდში საპრეზიდენტო კანდიდატზე კონსულტაციები დაიწყო მისთვის არავის უთქვამს, რომ მხარდაჭერის სანაცვლოდ ვინმეს გარიგებოდა ან რამე გაეკეთებინა”
“ამ პერიოდის განმავლობაში არ მქონია არცერთი წინაპირობა, კონსულტაცია თუ გარიგება იმ კუთხით, რომ ვინმეს ჩემთვის ეთქვა ამას და ამას თუ არ ვიზამდი, მხარს არ დამიჭერდა, ან თუ ვიზამდი მხარს დამიჭერდა. ჩემი კანდიდატურა ჩემივე გადაწყვეტილებით დადგა მხოლოდ და მმართველმა პარტიამაც გადაწყვეტილება ჩემგან დამოუკიდებლად, ბევრი აწონ-დაწონვის შემდეგ მიიღო. ასე, რომ მე რაიმე სახის წინა დაპირება (“ქართული ოცნებისთვის”) არ მიმიცია”, – განაცხადა სალომე ზურაბიშვილმა.
ზურაბიშვილის განცხადებით, პარლამენტში დეპუტატობის დროს მას რამდენიმე საკითხზე თავისი განსხვავებული პოზიცია ჰქონდა, მაგალითად ორმაგ მოქალაქეობაზე, რომელშიც მმართველი პარტია დაარწმუნა. ზურაბიშვილის თქმით, ასეთივე საკითხი იყო მარტოხელა დედების სტატუსი. “და მომავალშიც ასე ვაპირებ, რომ დავარწმუნო რამდენიმე საკითხში, რომელიც მე ამ ქვეყნისთვის ძალიან მნიშვნელოვნად მიმაჩნია”, – განაცხადა სალომე ზურაბიშვილმა.
“ვისაც ეჭვი აქვს იმაზე, ვიქნები თუ არა დამოუკიდებელი, უნდა გაიხსენონ ის მინისტრი, რომელიც სააკაშვილმა მოიყვანა. ძალიან მალე მიხვდა სააკაშვილი, რომ მასზე დამოკიდებული ვერ და არ ვიქნებოდი. ეს იყო იმ დაპირისპირების საფუძველი, რომელიც შემდეგ გარღმავდა და დამთავრდა ისე, როგორც ყველამ ვიცით. იმ პერიოდში ყველა სააკაშვილზე იყო დამოკიდებული და ძალიან რთული იყო განსხვავებული პოზიციების დაფიქსირება”, – განაცხადა პრეზიდენტობის კანდიდატმა სალომე ზურაბიშვილმა.
სალომე ზურაბიშვილის განცხადებით, ის დამოუკიდებელია 16 წლიდან და მისი თქმით, ამ ასაკში, 66 წლისას ვერავინ შეძლებს, რომ მას პრინციპები შეაცვლევინოს:
“თუ წითელ ხაზებს რამე შეეხება, იქ ვიქნები მე – სალომე ზურაბიშვილი”, – თქვა პრეზიდენტობის კანდიდატმა “იმედის კვირასთან” ინტერვიუში.
საპრეზიდენტო არჩევნების მეორე ტური 28 ნოემბერს გაიმართება.