„ნაციონალური მოძრაობის“ საპრეზიდენტო კანდიდატმა, გრიგოლ ვაშაძემ საკუთარი არჩევანი ქუთაისში 22-ე საარჩევნო უბანზე დააფიქსირა. ხმის მისაცემად ის მეუღლესთან, ნინო ანანიაშვილთან და შვილთან ერთად მივიდა.
„იმედი მაქვს, რომ ჩვენი მოქალაქეები, ადამიანები, რომლების 1990 წლიდან კბილებით ინარჩუნებენ დემოკრატიას ამ ქვეყანაში, რომლებიც ყველაფერს აკეთებენ სახელმწიფოებრიობის შესანარჩუნებლად, რათა სამ სვეტზე იყოს დაფუძნებული სახელმწიფო, – თანასწორობაზე, სამართლიანობასა და განვითარებაზე, ყველა მოვა საარჩევნო უბნებზე და გააკეთებენ სწორ არჩევანს. საქართველოს უაზროს, უვიცად, ფუჭად დასახარჯი დრო აღარ აქვს“ – თქვა ვაშაძემ.
დღეს საქართველოში საპრეზიდენტო არჩევნების მეორე ტური ტარდება.
არჩევანი ორ კანდიდატს შორის უნდა გაკეთდეს. ესენი არიან ნაციონალური მოძრაობის კანდიდატი გრიგოლ ვაშაძე და დამოუკიდებელი კანდიდატი სალომე ზურაბიშვილი.
დღეს საქართველო 5-ის ნაცვლად 6 წლით, პირდაპირი წესით ბოლოჯერ ირჩევს საქართველოს პრეზიდენტს.
2018 წლის საპრეზიდენტო არჩევნების მეორე ტურის საბოლოო შედეგებს შეგიძლიათ გაეცნოთ ამ ბმულზე.