სოციალური ფორუმი „ამერიკის ნამდვილი მეგობრები“ დიასპორის საკითხებში საქართველოს სახელმწიფო მინისტრ გელა დუმბაძეს მიმართავს და ითხოვს პასუხს, შეესაბამება თუ არა სიმართლეს ინფორმაცია, რომ სამინისტროს თანამშრომლების ხელფასებიდან თანხა პაატა ბურჭულაძის ფონდ “იავნანას” ანგარიშზე ირიცხება.
„როგორც ჩვენთვის გახდა ცნობილი, ხუთ წელზე მეტია, რაც თქვენი სამინისტროს თანამშრომლების ხელფასებიდან იჭრება და მომღერალ პაატა ბურჭულაძის ფონდ “იავნანას” ანგარიშზე ირიცხება გარკვეული ოდენობის თანხა. გავრცელებული ხმებით თანხის ჩამოჭრა ხდება დიასპორის საკითხებში ყოფილ სახელმწიფო მინისტრსა და ბატონ პაატა ბურჭულაძეს შორის სიტყვიერი შეთანხმების საფუძველზე, რასაც თანამშრომელთა ნებასთან არაფერი საერთო არ აქვს. მიუხედავად იმისა, რომ ბოლო ხანს, ბურჭულაძის ფონდის საქმიანობის მიმართ გარკვეული ეჭვები და კითხვები გაჩნდა, თანხების ჩამოჭრა ისევ გრძელდება. გთხოვთ, გვიპასუხოთ, შეესაბამება თუ არა სიმართლეს აღნიშნული ინფორმაცია . პატივისცემით სოციალური ფორუმი “ამერიკის ნამდვილი მეგობრები”, – აღნიშნულია განცხადებაში, რომლითაც სოციალურმა ფორუმმა გელა დუმბაძეს მიმართა.