პარლამენტის განათლების კომიტეტის თავმჯდომარე მარიამ ჯაშმა განაცხადა, რომ 5 წლის ბავშვების სკოლაში მიღების საკითხი ამ ეტაპზე დღის წესრიგიდან მოხსნილია.
“გადაწყვეტილება სკოლის დაწყების ასაკის ცვლილებასთან დაკავშირებით არ არის დამოკიდებული მხოლოდ პოლიტიკის შემუშავების პროცესსა და გადაწყვეტილების მიმღებ პირთა დამოკიდებულებაზე ან თუნდაც იმ დამოკიდებულებებზე, რომელიც არსებობს როგორც სამეცნიერო, ასევე პრაქტიკული გამოცდილებიდან.
პირველი გახლავთ არასაკმარისი ინფრასტრუქტურული შესაძლებლობები სკოლებში, განსაკუთრებით დიდ ქალაქებში და პირველ რიგში თბილისში. თუ მივიღებთ ამ გადაწყვეტილებას, ჩვენ უნდა ვიყოთ მზად 15-დან 20 ათასამდე დამატებითი პირველკლასელის მისაღებად – რაც დღევანდელი მდგომარეობით არ არის რეალური. მეორე – იმ ქვეყნებში, სადაც ხდება გამონაკლისი წესით არასავალდებულო ასაკში მოსწავლეების მიღება, არსებობს სასკოლო მზაობის შეფასებების ინსტრუმენტები, რომლებიც ინერგება სკოლის, მუნიციპალიტეტის, შტატის საგანმანათლებლო უწყებების დონეზე და მხოლოდ ამის შემდგომ ხდება ბავშვთა რეგისტრაცია სკოლებში. ამ თემასთან დაკავშირებით ვაგრძელებთ მუშაობას, თუმცა მე არ მინდა შეიქმნას მოლოდინები, რომ მიმდინარე წელს ჩვენ შეიძლება გვქონდეს ცვლილებების შესაძლებლობა“, – განაცხადა ჯაშმა.
სასკოლო ასაკი “ზოგადი განათლების შესახებ” საქართველოს კანონის მიხედვით განსაზღვრულია. 2015-2016 და ყოველი შემდგომი სასწავლო წლისთვის სასკოლო ასაკის მქონედ მიიჩნევიან ბავშვები, რომელთაც 6 წელი შეუსრულდებათ სასწავლო წლის დაწყებამდე.