„თიბისი ბანკის“ სამეთვალყურეო საბჭოს თავმჯდომარის მოადგილის, ბადრი ჯაფარიძის განცხადებით, 17 მილიონი დოლარი, რომლის სესხების მართლზომიერებასაც პროკურატურა სწავლობს, მსოფლიო ბანკსა და „თიბისი ბანკის“ კაპიტალში გადაირიცხა.
„17 მილიონი დოლარი, რომელიც ვისესხეთ, გადაირიცხა მსოფლიო ბანკსა და „თიბისი ბანკის“ კაპიტალში. თუ ეს შეიძლება, ფულის გათეთრებად ჩაითვალოს, თქვენ თვითონ განსაჯეთ. თავის დროზე ფული ცნობილი ჰოლანდიელი ბიზნესმენებისგან ვისესხეთ, ასევე ერთ-ერთი დიდი ფონდისგან, რათა ბანკის კაპიტალი გაგვეზარდა და ნაწილი გადარიცხული იყო მსოფლიო ბანკის ანგარიშზე“, – განაცხადა ბადრი ჯაფარიძემ.
ამასთან, კითხვაზე, შესთავაზა თუ არა წილების დათმობა საქართველოს ყოფილმა პრემიერ-მინისტრმა ბიძინა ივანიშვილმა და იყო თუ არა ჩართული მოლაპარაკებებში საქართველოს შინაგან საქმეთა მინისტრი გიორგი გახარია, ბადრი ჯაფარიძემ აღნიშნა, რომ ეს აბსოლუტური სიცრუეა.
„არა, აბსოლუტური სიცრუეა, მსგავსი თხოვნა არავისგან ყოფილა“, – განაცხადა ბადრი ჯაფარიძემ.