არჩილ თალაკვაძე – ის, რაც ეროვნული ბანკის პრეზიდენტმა ბრძანა, სრულიად არგუმენტირებულია

„ის, რაც ეროვნული ბანკის პრეზიდენტმა ბრძანა, სრულიად არგუმენტირებულია“, – ასე შეაფასა პარლამენტის უმრავლესობის ლიდერმა არჩილ თალაკვაძემ კობა გვენეტაძის მოხსენება.
„მადლობა მთელ საზოგადოებას, ვინც აქ არის მოსული. მადლობა ეროვნული ბანკის პრეზიდენტს, რომელმაც ზედმიწევნით შეასრულა კანონისა და რეგლამენტის მოთხოვნები და მიუხედავად იმისა, რომ აქ იყო მოლოდინები, რომ არ მოვიდოდა, ის გამოცხადდა სხდომაზე. რაც შეეხება განცხადებას, მოკლედ მინდა გამოვეხმაურო. ის, რაც მან ბრძანა, სრულიად არგუმენტირებულია. ვფიქრობ, რომ რეგულაციებთან დაკავშირებით მართლაც უპრიანი იქნება, ლოგიკურიც არის, მინიმუმ ერთი კვარტალი იყოს გასული“, – განაცხადა თალაკვაძემ.
რაც შეეხება „თი-ბი-სი ბანკთან“ დაკავშირებულ პროცესებზე ეროვნული ბანკის პრეზიდენტის მოხსენებას, არჩილ თალაკვაძის თქმით, ის ეთანხმება კობა გვენეტაძის არგუმენტებს, რომ საკითხის პირდაპირი განხილვა უპრეცედენტოა და ეწინააღმდეგება ბანკსა და რეგულატორს შორის ურთიერთობის პრინციპებს.
„რაც შეეხება მეორე საკითხს, აქ, ვფიქრობ, ძალიან სერიოზული არგუმენტების შეფასება მოგვიწევს დღეს ჩვენ, სანამ გადავალთ და თუ გადავალთ იმ რეჟიმში, რაზეც არის ოპოზიციის მხრიდან მოთხოვნა, ვინაიდან გუშინდელ განცხადებაშიც და დღეს მის გამოსვლაშიც აშკარად იყო არგუმენტირებული. ამ ფორმატში პირდაპირი განხილვა უპრეცედენტოა და ვფიქრობ, იმ თანამშრომლობის სულისკვეთებას და პრინციპებს, რაც უნდა არსებობდეს რეგულატორსა და ბანკს შორის, ეწინააღმდეგება. მეორე ის, რომ ძალიან მნიშვნელოვანია სხვა არგუმენტებიც, იმიტომ, რომ საქმე ეხება ქვეყნის ერთ-ერთ სისტემურ ბანკს, ღია განხილვა, მათ შორის იქნება ალბათ ისეთი ინფორმაციაც ამ განხილვაში საჭირო არგუმენტაციისთვის, რომელიც კომერციულ საიდუმლოს ან ბანკისთვის რაღაც განსაკუთრებულ მნიშვნელოვან ხასიათს ატარებდეს. შესაბამისად, ამ არგუმენტში ვეთანხმები ეროვნულ ბანკს, რომ ამ ფორმატში შესაძლოა დამაზიანებელიც კი აღმოჩნდეს“, – არჩილ თალაკვაძემ.
პარლამენტის დარგობრივი ეკონომიკის და ფინანსთა კომიტეტების სხდომაზე დღეს „თი-ბი-სი ბანკის“ დამფუძნებლები მამუკა ხაზარაძე და ბადრი ჯაფარიძე მივიდნენ.