ვაკის მაჟორიტარი დეპუტატი, ბიძინა გეგიძე, ბაგებში, ე.წ. მეტრაპარკის დასახლებისა და ილია ჭავჭავაძის I ჩიხის, ამხანაგობა „მზიური რეზიდენსის“ მაცხოვრებლებს შეხვდა, სადაც რეკრეაციულ ზონებსა და მეწყერსაშიშ ადგილებში დაგეგმილია ახალი, მრავალსართულიანი სამშენებლო კომპლექსების მშენებლობა.
როგორც ვაკის მაჟორიტარი დეპუტატი აცხადებს, „წყნეთის გზატკეცილის მიმდებარედ, შპს „მეტრა დეველოპმენტის“ მიერ დაგეგმილია 3 მრავალსართულიანი საცხოვრებელი კორპუსის მშენებლობა აქტიურად გამწვანებულ სივრცეში, მეწყერსაშიშ ტერიტორიაზე, რომელიც მიზნად ისახავს ბუნებრივი ლანდშაფტის სრულ განადგურებას, რაც გამოიწვევს მეწყერული პროცესების გააქტიურებას“.
არსებული ინფორმაციით, შპს „მეტრა დეველოპმენტის“ მიერ თბილისის მერიის არქიტექტურის სამსახურში უკვე წარდგენილია საცხოვრებელი კომპლექსის არქიტექტურული პროექტი და პროცესი განხილვის ეტაპზეა.
„მიუხედავად იმისა, რომ არსებობს არაერთი დასკვნა, რომლის მიხედვითაც, მაცხოვრებლების უსაფრთხოების მიზნით, აკრძალული უნდა იყოს აღნიშნულ ტერიტორიაზე დამატებითი მრავალბინიანი საცხოვრებელი კომპლექსის მშენებლობა, კომპანიის მხრიდან აქტიურად მიმდინარეობს სამშენებლოდ ტერიტორიის მომზადება. აღნიშნული სრულებით ეწინააღმდეგება მოსახლეობისთვის ჯანსაღი და უსაფრთხო საცხოვრებელი გარემოს შექმნის პრინციპს, რადგან დაგეგმილი სამუშაოები ხორციელდება ფერდობზე, ძალიან რთულ რელიეფზე, რომელიც ქანობი და მეწყერსაშიში ტერიტორიაა,“ – აცხადებს ბიძინა გეგიძე.
ვაკის მაჟორიტარის განცხადებით, არანაკლებ პრობლემატურია მშენებლობა უშუალოდ მზიურის პარკის ტერიტორიაზე, რომელიც რეკრეაციული ზონაა და არაერთი ნარგავია გაშენებული.
„უგულებელყოფილია მერიის დაპირებები, თითქოს მზიურის პარკის ტერიტორიაზე არ დაუშვებენ მშენებლობებს. მზიურის პარკის ტერიტორიაზე შეიცვალა მიწის ნაკვეთების ფუნქციური ზონის სტატუსი, გაიზარდა სამშენებლო კოეფიციენტები და გაიცა სამშენებლო ნებართვა ორ 14 სართულიანი კორპუსის მშენებლობაზე, ხოლო მესამე შენობაზე ნებართვის გაცემაზე მიმდინარეობს განხილვა. ჭავჭავაძის პირველ ჩიხში მსგავსი მასშტაბების პროექტის მშენებლობა საფრთხეს უქმნის ადგილობრივ მოსახლეობას. გარდა ამისა, პარკის ტერიტორიაზე უკვე მოჭრილია ათეულობით ხე და მზიურის პარკი, ფაქტობრივად, კორპუსების ეზოს ფუნქციას შეიძენს“, – განაცხადა ვაკის მაჟორიტარმა.
ბიძინა გეგიძის შეფასებით, პრობლემაა ის ფაქტიც, რომ თბილისის მერიის არქიტექტურის სამსახურმა არ გაითვალისწინა ადგილობრივი მოსახლეობის თხოვნა პროექტის დამტკიცებისა და განხილვის პროცესში მათ ჩართულობაზე, რაც პირდაპირი სამართალდარღვევა და საკუთარი მოსახლეობის ინტერესების უგულებელყოფაა. როგორც ვაკის მაჟორიტარმა განაცხადა, ადგილზე დეტალურად მოიკვლევს აღნიშნულ პრობლემებს.