შემოსავლების სამსახურის ოფიცრებმა ხე-ტყის უკანონოდ ტრანსპორტირების 46 შემთხვევა გამოავლინეს.
2016 წლის იანვარ-ივნისის განმავლობაში, შემოსავლების სამსახურის საგადასახადო მონიტორინგის ოფიცრების მიერ, სამეგრელოს, გურიისა და ზემო სვანეთის ტერიტორიაზე გამოვლენილია 92 კუბური მეტრი, 46 ათასი ლარის ღირებულების ხე-ტყის მასალის, სასაქონლო ზედნადების გარეშე ტრანსპორტირების 46 შემთხვევა. სამსახურის ინფორმაციით, 157 კუბური მეტრის მოცულობის, 81620 ლარის ღირებულების ზედნადების გარეშე ტრანსპორტირების ფაქტების შესახებ, მასალები ფინანსთა სამინისტროს საგამოძიებო სამსახურს გადაეცა. კანონდამრღვევებს სანქციის სახით ჯარიმა ჯამში 99100 ლარის ოდენობით შეეფარდათ.
„აღნიშნული პერიოდის განმავლობაში დაფიქსირებულია კანონდარღვევის ისეთი ფაქტები, როგორიცაა ხე-ტყის წარმოშობის დოკუმენტების და შეძენის დამადასტურებელი დოკუმენტების გარეშე ან/და უკანონოდ მოპოვებული ხე-ტყის ტრანსპორტირება, რომელთა საბაზრო ღირებულება აღემატება 10000 ლარს; ფიქტიური ოპერაციებით გაზრდილი ნაშთის გამოყენებით, ხე-ტყის ტრანსპორტირება, რომელზედაც გაწერილი იყო ელ. ს/ზედნადები. ტრანსპორტირებისას მასალები განთავსებული იყო მანქანების ნაგვერდულებს შორის, სატვირთო მიკრო ავტობუსების ჭერში მოწყობილი სამალავებში, მსუბუქ ავტომანქანებში, სატვირთო ავტომანქანების გადახურული ბორტის როგორც ჭერსა და იატაკზე, ასევე გვერდებზე მოწყობილ სამალავებში. საქმეთა მასალები შემდგომი რეაგირების მიზნით, გადაეცა საგამოძიებო სამსახურს“, – აცხადებენ შემოსავლების სამსახურში.