სოციალური ქსელის ერთ-ერთმა მომხმარებელმა თ.მ.-მ გუშინ “ფეისბუქის” პირად გვერდზე პოსტი განათავსა, სადაც ყოფილი ქმრისა და მისი ოჯახის მხრიდან ძალადობაზე საუბრობდა. მან ბავშვის ფოტოც გამოაქვეყნა და ვარაუდობს, რომ მის მიმართაც ძალადობას ჰქონდა ადგილი. შემთხვევა ვანში მოხდა.
გთავაზობთ ამონარიდს თ.მ.-ს ფეისბუქპოტიდან:
“ამას იმიტომ ვწერ, რომ ისეთი ნაცემი ვარ, მგონი ხვალამდე ვერ მივაღწიო და თუ ჩავაკვდი დღეს ესე აკანკალებული და ცოცხალ-მკვდარი დედაჩემს ხელებში, იცოდეთ ვისი ბრალია. დედის და დანიელის ესეთი მდგომარეობა რომ ვერ ავიტანე და ამბავი ვიკითხე, მაგის გამო მეც გამიგდო ორმა არაკაცმა ფეხქვეშ. ჩვეულებრივი ძალადობის მსხვერპლი ვარ, 4 წელია უკვე და თუ არავინაა ჩემი დამხმარე ამ ქვეყნად, მაშინ ბებიაჩემთან მიწაში ყოფილა ჩემი ადგილი და წავალ და თქვენც დაისვენებთ და მეც”,- წერს სოციალური ქსელის მომხმარებელი.
მან ისიც აღნიშნა, რომ პოლიციას ვერ მიმართავდა, რადგან მისი ყოფილი მეუღლის მამა ამ უწყებაში მუშაობს და ეს პრობლემა მის სასარგებლოდ ვერ მოგვარდებოდა.
აღნიშნულ ფეისბუქპოსტთან დაკავშირებით, “კვირა” შს სამინისტროს დაუკავშირდა, სადაც აცხადებენ, რომ სოციალურ ქსელში გავრცელებულ პოსტზე პოლიციამ დაუყოვნებლივ მოახდინა რეაგირება. მათივე ცნობით, გამოძიება სსკ-ის 126-ე პრიმა მუხლით მიმდინარეობს, რაც ოჯახში ჩადენილ ძალადობას გულისხმობს.
ამავდროულად, უწყებაში უარყოფენ იმ ფაქტს, და აცხადებენ რომ თ.მ.-ს მამათილი ამჟამად პოლიციაში არ მუშაობს.
“გვიან ღამით, პოსტის დაწერიდან რამდენიმე წუთში, პოლიციამ მოახდინა რეაგირება და გამოძიება სსკ-ის 126-ე პრიმა მუხლით დაიწყო, რაც ოჯახში ჩადენილ ძალადობას გულისხმობს. გამოძების ფარგლებში, მიმდინარეობს გამოკითხვები, დაინიშნა სასამართლო-სამედიცინო ექსპერტიზა, ჯანმრთელობის დაზიანების ხარისხის დადგენის მიზნით. ასევე აღსანიშნავია, რომ გოგონას ყოფილი მეუღლის მამა, როგორც ამას თ.მ. აცხადებს, პოლიციაში არ მუშაობს”,- აცხადებენ უწყებაში.
“კვირა”