„ჩვენ შევქმნით კომისიას, რომელშიც შევა ყველა უწყების წარმომადგენელი და დავიწყებით დელიმიტაციის და დემარკაციის პროცესს. ეს პროცესი არის საკმაოდ რთული, დროში ტევადი და მანამდე სანამ იქნება კონკრეტული გადაწყვეტილებები მიღებული, გადაადგილების ჩვეულებრივი პრაქტიკა გაგრძელდება“, – ამის შესახებ პრემიერმინისტრმა მამუკა ბახტაძემ დავით გარეჯის მონასტრის ინციდენტთან დაკავშირებით „ქრონიკასთან“ ისაუბრა.
„მე ძალიან კარგად მესმის, რომ ქართველისთვის ეს არის ძალიან ემოციური საკითხი. მინდა ვთხოვო ყველას, რომ თავი შევიკავოთ გადაუმოწმებელი ინფორმაციის გავრცელებისგან. ჩვენ და აზერბაიჯანი ვართ მეგობრები და პარტნიორები და გადავწყვეტთ საკითხს ისე, რომ სიტუაცია დარეგულირდეს“, – განმარტავს პრემიერმინისტრი.
დავით გარეჯში, უდაბნოს მონასტრამდე მისასვლელი გზა ცოტა ხნით დაკეტილი იყო. ამის შესახებ თავდაპირველად ინფორმაცია არქიმანდრიტმა კირიონმა (ონიანი) გაახმოვანა და დახმარება ითხოვა. ის ამბობდა, რომ აზერბაიჯანელებმა უდაბნოს მონასტერი გადაკეტეს და სასულიერო პირებს მონასტერში აღარ უშვებდნენ. მათ შორის პრობლემები ჰქონდათ გადაადგილების კუთხით ტურისტებსა და მომლოცველებს.მაშინ არქიმანდრიტმა თქვა, რომ გარეჯში სიტუაცია მას შემდეგ გართულდა, რაც იქ პრეზიდენტი სალომე ზურაბიშვილი იმყოფებოდა.
აღდგომის დღესასწაულამდე ერთი დღით ადრე, სასულიერო პირებისთვის, მომლოცველებისა და ტურისტებისთვის უდაბნოს მამათა მონასტრამდე მისასვლელი გზა გაიხსნა.