ნაძალადევის რაიონში, გურამიშვილის გამზირი N39ა-ს მიმდებარედ და კაკაბაძის N4ა-თან არსებულ ჩიხში გზის რეაბილიტაცია ბოლო ეტაპზეა. პირველ მისამართზე მოეწყო ბორდიური და ასფალტის ორფენიანი საფარი დაიგო, კაკაბაძის ჩიხში კი ასფალტის ერთი ფენა იგება.
მიმდინარე საგზაო სამუშაოებს ნაძალადევის რაიონის გამგებელი ირაკლი ხელაძე გაეცნო.
„საგზაო ინფრასტრუქტურის მხრივ ამ ტერიტორიაზე საკმაოდ რთული მდგომარეობა იყო. ორივე მისამართზე ხვალამდე დასრულდება ასფალტის დაგება. გარდა ამისა, მარტში გზის რეაბილიტაცია განვახორციელეთ გურამიშვილის გამზირიდან კაკაბაძისა და სადმელის ქუჩების კვეთამდე არსებულ მონაკვეთზე. სამივე მისამართი ერთმანეთის მიმდებარედ მდებარეობს და მთლიანობაში ადგილობრივ მოსახლეობას საგზაო პრობლემები მოუგვარდა“, – განაცხადა ირაკლი ხელაძემ.
აღნიშნულ ტერიტორიაზე, სამივე მისამართზე გზის სარეაბილიტაციო სამუშაოები ჯამში, 1 613 კვ.მ ფართობზე შესრულდა, რისთვისაც ნაძალადევის რაიონის გამგეობამ 108 000 ლარი დახარჯა.