პოლიტიკურმა გაერთიანება „ქართული ოცნება-დემოკრატიული საქართველომ“ 8 ოქტომბრის საპარლამენტო არჩევნებისთვის მაჟორიტარი დეპუტატობის კანდიდატები დღეს რუსთავში წარადგინა.
კანდიდატები პრემიერ-მინისტრმა, „ქართული ოცნება-დემოკრატიული საქართველოს“ თავმჯდომარემ გიორგი კვირიკაშვილმა საზოგადოებას თავად წარუდგინა.
რუსთავის 29-ე ოლქში მაჟორიტარი დეპუტატობის კანდიდატი ,,ქართული ოცნებიდან“ პაატა მხეიძე იქნება. ამჟამად პაატა მხეიძე სასჯელაღსრულებისა და პრობაციის სამინისტროს საგამოძიებო დეპარტამენტის უფროსის მოადგილეა.
რუსთავის 30-ე ოლქში მაჟორიტარ კანდიდატად წარდგენილია გიორგი ბეგაძე. გიორგი ბეგაძე ეკონომიკის მაგისტრი და ილიას სახელმწიფო უნივერსიტეტის ტურიზმის მენეჯმენტის ცენტრის დირექტორია.
წალკასა და დმანისში კახა ოქრიაშვილის კანდიდატურა არის წარდგენილი. კახა ოქრიაშვილი პარლამენტის დეპუტატია.
ბოლნისის მაჟორიტარობის კანდიდატი ,,ქართული ოცნებიდან“ იქნება გოგა მეშველიანი. ის ამჟამად ბოლნისის მუნიციპალიტეტის გამგებელია.
გარდაბანში ”ქართული ოცნების კანდიდატი იქნება სავალან მირზოევი. მირზოევი გარდაბნის გამგეობის ადმინისტრაციის უფროსი, რეინტეგრაციის საკითხებში სახელმწიფო მინისტრის წარმომადგენელი იყო ქვემო ქართლში. ახლა კი, პრემიერ-მინისტრის თანაშემწეა ეროვნული უმცირესობების საკითხებში.
თეთრიწყაროს მაჟორიტარობის კანდიდატად პარტიას წარგენილი ჰყავს გოდერძი ჩანქსელიანი. ის იყო ორგანიზებულ დანაშაულთან ბრძოლის სამმართველოს განყოფილების უფროსი.
მარნეულის 35-ე ოლქში „ქართული ოცნება“ მაჟორიტარ კანდიდატად წარადგენს რუსლან გაჯიევის კანდიდატურას. რუსლან გაჯიევი მარნეულის რაიონის საგანმანათლებლო რესურსცენტრის ხელმძღვანელია.
მარნეულის 36-ე ოლქში წარდგენილია თამაზ ნავერიანის კანდიდატურა, რომელიც მარნეულის მუნიციპალიტეტის კომპლექსური სპორტსკოლის დირექტორია.