„ქართული ოცნებიდან” ქუთაისის საკრებულოს წევრი, ნანა კოსტავა ამბობს, რომ უფალთან, საზოგადოებასთან და სალომე ბარკერთან ის მართალია.
“მიმაჩნია, რომ მართალი ვარ, რადგან არ ვიცოდი ეს ინფორმაცია. გავა დრო და დარწმუნდება ხალხი ჩემს პიროვნებაში. მთელი ქალაქი მიცნობს და იცის, ვინ ვარ და რა ვარ და რომ ბავშვის სიკვდილი მიხარია თუ არა. გაირკვევა თეთრიც და შავიც”, – აცხადებს ყოფილი დეპუტატი.
მისი თქმით, ჯვარზეც რომ გააკრან, როგორც იესო ქრისტე, მართლმადიდებლობის შეურაცხოფას ყოველთვის დაგმობს. ის აღნიშნავს, რომ “უხარია, უფლისა და მართლმადიდებლობის დაცვის გამო ქვებს, რომ ესვრიან”.
“თუ გინდ ჯვარიც დამადე, თუ გინდა მაწამე, თუ გინდა ძმარიც მასვი, როგორც უფალი იესო ქრისტე, მე არაფრის არ მეშინია. ქრისტე ჯვარს ეცვა ჩვენთვის და ჩვენც ჯვარს ვეცმებით მისთვის. ეს იყო ინფორმაციის არცოდნა, რომელშიც მე თავს დამნაშავედ არ ვგრძნობ”, – აცხადებს კოსტავა.
ის ამბობს, რომ გუნდი რა გადაწყვეტილებასაც მიიღებს, პატივს სცემს. მისივე თქმით, თუ საჭირო გახდება, თბილისში სალომე ბარკერთან ჩავა და მიუსამძიმრებს.
“დედა, ასე შეკრული ერი ნეტავი ვიყოთ დავით გარეჯის მიმართებაში, სამაჩაბლოს მიმართებაში, აფხაზეთის მიმართებაში. ვთქვათ, რაღაც ვიცოდი და შევცდი, გამოვშტერდი ამხელა ქალი, ასეთი ზიზღი და ბოღმა შეიძლება? ბულინგის მსხვერპლი რომ ვარ, იმას ვერ ხვდებით?” – თქვა საკრებულოს წევრმა.
ქუთაისის საკრებულოში ქართული ოცნების დეპუტატმა, ნანა კოსტავამ Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: “კაი დღეში ხარ ახლა, იცინე!” საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.
მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა.