თბილისში, ისან-სამგორის რაიონში ყვითელი მიკროავტობუსების მოძრაობა დილიდან შეფერხებული იყო. ამის მიზეზი გახდა კაიროს ქუჩის მცხოვრებლების აქცია, რომლებმაც მიკროავტობუსების ფარეხთან მისასვლელი გზა გადაკეტეს.
ისინი ქუჩაზე ასფალტის საფარის რეაბილიტაციას ითხოვენ. ამის გამო ვარკეთილის ხაზებზე მიკროავტობუსები ვერ გავიდნენ.
“3 ივნისს, დილის 06:00 საათზე კაიროს ქუჩაზე მდებარე თბილისის მიკროავტობუსების ავტოფარეხიდან სატრანსპორტო საშუალების სამუშაო ხაზებზე გასვლას შეექმნა პრობლემა. ადგილობრივმა მოსახლეობამ გასასვლელი ჩაკეტა კონკრეტული მოთხოვნების საფუძველზე, რომელიც არ უკავშირდება კომპანიის მუშაობას. ამ დროისთვის ავტოფარეხიდან მიკროავტობუსების გასასვლელი გათავისუფლებულია და სატრანსპორტო საშუალებების მოძრაობა აღდგენილია“, – აღნიშნულია „თბილისის მიკროავტობუსის“ განცხადებაში.
მანამდე გავრცელდა ინფორმაცია, რომ თბილისში ყვითელი მიკროავტობუსების მძღოლები გაიფიცნენ.