კასპში მომხდარი მკვლელობის სავარაუდო მოტივი დასახელდა. როგორც სოფელ ხიდისყურში ადგილობრივები ჰყვებიან, თავდასხმის მიზეზი შურისძიებაა, რადგან ოჯახებს წლების განმავლობაში დაპირისპირება ჰქონდათ.
დანაშაულის ჩამდენი იდენტიფიცირებულია და ის თანასოფლელია. დანაშაულის ადგილზე ორი ტიპის იარაღი – ცეცხლსასროლი და სანადირო იარაღია გამოყენებული. პოლიცია ბოროტმოქმედს ეძებს.
კასპის მუნიციპალიტეტის სოფელ ხიდისყურში მკვლელობა მოხდა. ცოლ-ქმარი ეზოში ნახეს. 50 წლამდე ასაკის ქალს დაზიანება თავის არეში აქვს და ის კასპის საავადმყოფოში გადაიყვანეს, 70 წლამდე კაცი კი უკვე გარდაცვლილი იყო.
გამოძიება განზრახ მკვლელობისა და დამამძიმებელ გარემოებაში ორი ან მეტი პირის მიმართ ჩადენილ განზრახ მკვლელობის მცდელობის ფაქტებზე, საქართველოს სსკ-ის 108-ე და 19-109-ე მუხლის მე-3 ნაწილის „ა“ ქვეპუნქტით მიმდინარეობს. ჩადენილი დანაშაული 16-დან 20 წლამდე ვადით, ან უვადო თავისუფლების აღკვეთას ითვალისწინებს.