ეკონომიკისა და მდგრადი განვითარების მინისტრს, ნათია თურნავას განმარტების გაკეთება მოუწია, 2006 წელს, ეკონომიკის სამინისტრო რატომ დატოვა.
კომიტეტის სხდომაზე, ჭიათურის მაჟორიტარმა დეპუტატმა სულხან მახათაძემ აღნიშნა, რომ 2006 წელს, „ჭიათურ მანგანუმი“ გააკოტრეს, 125 მილიონ ლარად „ზესტაფონის ფერო“, „ჭიათურ მანგანუმი“, „ვარციხე ჰესი“ გაყიდეს, რაც თაღლითობა იყო.
მახათაძის ამ განცხადებას პარლამენტის ვიცე-სპიკერი სერგი კაპანაძე გამოეხმაურა და განაცხადა, რომ 2006 წელს, ნათია თურნავა ეკონომიკის მინისტრის მოადგილე იყო და ეთანხმებოდა თუ არა, ამ განცხადებას.
„ჭიათურის მაჟორიტარი დეპუტატი ამბობს, რომ კომპანიის ხელოვნურად გაკოტრება მოხდა, ხართ თუ არა პასუხისმგებელი ამ საკითხზე?“, – მიმართა კაპანაძემ თურნავას.
კითხვის საპასუხოდ ნათია თურნავამ აღნიშნა, რომ სხვადასხვა მთავრობის პირობებში, ეკონომიკის სამინისტროში მაღალ თანამდებობაზე მუშაობდა, თუმცა ყოველთვის მის საქმეს ემსახურებოდა და არა კონკრეტულ პირებსა და მთავრობებს.
„დიახ, სწორია, სხვადასხვა მთავრობის პირობებში, ეკონომიკის სამინისტროში მაღალ თანამდებობაზე ვმუშაობდი, თუმცა ყოველთვის ჩემს საქმეს ვემსახურებოდი და არა კონკრეტულ პირებს, მთავრობებს. თანამდებობიდან 2006 წელს წამოვედი, ჩემი წამოსვლის ერთ-ერთი მიზეზი ისიც იყო, რომ ისეთ ეკონომიკის სამინისტროში არც ჩემი ადგილი იყო, რადაც 2006 წელს გადაიქცა. ეჭვი მაქვს, ჩემთან თანამშრომლობის სურვილი არც იმდროინდელ მინისტრებს ექნებოდათ. რადგან 2004-2005 წლებში, სხვადასხვა მინისტრის, მათ შორის კახა ბენდუქიძისა და სხვების ხელმძღვანელობით, თავიდან სათავეში ძალიან მნიშვნელოვანი რეფორმების გატარება იდგა, მაგრამ მოგვიანებით სამინისტრო ბიზნესის მიმართ ტერორის მანქანის ჭანჭიკად გადაიქცა. ამას ვამბობ სრული პასუხისმგებლობით, არა როგორც მინისტრის მოადგილე, არამედ ამ ქვეყნის შვილი და ეს ყველაფერი ჩვენს თვალწინ ხდებოდა. არ გამიკვირდება, თუ იმ პერიოდში, ეს ხდებოდა, მათ შორის მსხვილი საწარმოების მიმართ, რადგან იმ პერიოდში, მსხვილი საწარმოები ერთ-ერთი სამიზნე იყო“, – განაცხადა თურნავამ.