გარდაბანში მომხდარ სასტიკ მკვლელობაზე ახალი დეტალები ხდება ცნობილი. ადგილობრივები ამბობენ, რომ მკვლელობა სავარაუდოდ, შურისძიების მოტივით მოხდა. ამ ეჭვს მათ დანაშაულის ჩამდენის მიერ დატოვებული გზავნილი უჩენთ.
„ღამე მომხდარა ეს საზარელი ფაქტი. შუქი არ ენთო, ამიტომ დავეჭვდით და დილას რომ შემოვიდნენ მეზობლები ცოლ-ქმარი მოკლული დახვდათ. მოხუცი კაცი საპირფარეშოში მოუკლავთ. ქალი კი სააბაზანოში. კარზე წარწერა დაუტოვებიათ: “ედიკ, გელოდებითო“ – ამბობს მეზობელი. მისივე თქმით, ედიკა, რომელსაც დანაშაულის ჩამდენმა გზავნილი დაუტოვა, მოკლული ცოლ-ქმრის ვაჟია.
დანაშაულის მიზეზად სავარაუდო შურისძიებას ასახელებს, მოკლული ცოლ-ქმრის ერთ-ერთი ნათესავი. მისი თქმით, სახლიდან ძვირფასი ნივთები წაღებული არ არის.
„ჩვენ ცოტა შორს ვცხოვრობთ, ამიტომ გვიან მოვედით. ამ მოხუცებმა ვის რა დაუშავეს, რატომ გაგვაუბედურეს? ასე სასტიკად ადამიანების მოკვლა როგორ შეიძლება. სახლიდან არაფერია წაღებული. უბრალოდ მოვიდნენ მოკლეს და წავიდნენ, ასე ჩანს ყოველ შემთხვევაში,“-ამბობს ნათესავი.
მოკლული მამაკაცის და ამბობს, რომ მისი ძმისშვილები მოსკოვში ცხოვრობენ. მისთვის გაუგებარია, რა შეიძლება გამხდარიყო დანაშაულის ჩადენინს მიზეზი. მისი თქმით, ოჯახის ახლობლებს ცხედრებიც კი არ აჩვენეს. არსებული ინფორმაციით, მოკლული ცოლ-ქმრის გვამები სასტიკად არის დასახიჩრებული.
“ჩემი ძმა ასე სასტიკად რატომ მოკლეს, ვის რა დაუშავა. ცხედრებიც არ გვანახეს. მოკლულების შვილები რუსეთში მუშაობენ. ერთი შვილი ახლა ჩამოვიდა, ნახეთ რა დღეში არიან,“-ამბობს მოკლულის და.
როგორც “რუსთავი 2”-ს შინაგან საქმეთა სამინისტროში განუცხადეს, მომხდარზე სისხლის სამართლის საქმე, დამამძიმებელ გარემოებებში განზრახ მკვლელობის მუხლით აღიძრა.
შეგახსენებთ, რომ ასაკოვანი ცოლ-ქმარი საკუთარ სახლში გვიან ღამით მოკლეს. მოკლული ცოლ-ქმარი მეზობლებმა დილით ნახეს.
“რუსთავი 2”