მიუხედავად იმისა, რომ მე თვითონ მელიას იმუნიტეტის მოხსნას დავუჭირე მხარი, ეს პროცესი მომწონს. მომწონს, რომ საქართველოში მუშაობს ახალი კონსტიტუცია, რისთვისაც მადლობას ირაკლი კობახიძეს და მმართველ გუნდს ვუხდი, – ამის შესახებ საქართველოს პირველ არხს საპარლამენტო უმრავლესობის წევრმა, ვანო ზარდიაშვილმა, დეპუტატ ნიკა მელიას საქმესთან დაკავშირებით საუბრისას განუცხადა.
“დღეს, აბსოლუტურად ახალ საქართველოში გავიღვიძეთ. დღეს სასაცილო ის იყო, რომ ოპონენტებს „ნაციონალური მოძრაობიდან“ კოვზი ნაცარში ჩაუვარდათ. ისინი მზად იყვნენ დაეგმოთ სასამართლო, პარლამენტი და ეს პროცესი წარმოეჩინათ, როგორც მარგინალური პროცესი, მაგრამ დაბნეულები ვნახეთ, რომლებიც დამოუკიდებელი სასამართლოს გადაწყვეტილებას არ ელოდნენ. ფსონებს აიღებდნენ, რომ სასამართლო ასიდან ას შემთხვევაში პატიმრობას გამოიყენებდა“, – განაცხადა ვანო ზარდიაშვილმა.