პარლამენტთან მიმდინარე აქციის ორგანიზატორი – ზოგიერთმა პოლიტიკოსმა უკვე ღალატიც მოასწრო

პარლამენტის შენობის წინ მიმდინარე აქციის ერთ-ერთი ორგანიზატორი, შოთა დიღმელაშვილი „შენების მოძრაობის“ ლიდერს, დავით უსუფაშვილს დღეს გაკეთებული განცხადების გამო აკრიტიკებს.
საუბარია უსუფაშვილის მოწოდებაზე, რომლითაც მან „ქართული ოცნების“ მიერ დაგეგმილ საარჩევნო სისტემის ცვლილების პრეზენტაციაზე შეკრებილ პოლიტიკურ სპექტრს სიტყვით გამოსვლისას მიმართა.
“ჯერ გაცნობაც ვერ მოვასწარით, არათუ დამეგობრება და ზოგიერთმა პოლიტიკოსმა უკვე ღალატიც მოასწრო. უსუფაშვილი, ს ვეშჩამი”, -დაწერა დიღმელაშვილმა სოციალურ ქსელში.
მის აღნიშნულ შეფასებას დავით უსუფაშვილის მეუღლე, თავდაცვის ყოფილი მინისტრი, თინა ხიდაშელი შემდეგი “ფეისბუქკომენტარით” გამოეხმაურა.
“რამე რომ არ შემომეღალატოს, იქნებ, დაგვიზუსტოთ, აღარ გვინდა პროპორციული? ღალატი სად დაფიქსირდა? თუ არა – გავიგე, თუ კი, მაშინ ამ კონსტიტუციას ვადები აქვს და თუ არავინ მონაწილეობს ამ პროცესში, ანუ “ოცნებამ” წეროს და იკითხოს და როგორც უნდა, ისე მიიღონ”, – დაწერა ხიდაშელმა.
ცნობისთვის, „შენების მოძრაობის“ ლიდერმა, დავით უსუფაშვილმა „ქართული ოცნების“ მიერ დაგეგმილ საარჩევნო სისტემის ცვლილების პრეზენტაციაზე შეკრებილ პოლიტიკურ სპექტრს სიტყვით გამოსვლისას ასე მიმართა: “გავიღიმოთ, ჩვენ პროპორციული არჩევნების ძეობაში ვართ და არა – გასვენებაში”.