უკრაინაში საქართველოს ახალი ელჩი ეყოლება, – ამის შესახებ საქართველოს საგარეო საქმეთა სამინისტროს პრესისა და ინფორმაციის დეპარტამენტში განაცხადეს.
მათივე ცნობით, უკრაინაში საქართველოს მოქმედი ელჩი გელა დუმბაძე საგარეო უწყებაში გააგრძელებს მუშაობას. როგორც პრესისა და ინფორმაციის დეპარტამენტში განაცხადეს, გელა დუმბაძე საქმიანობას გააგრძელებს საგანგებო დავალებათა ელჩის პოზიციაზე.
„როგორც მოგეხსენებათ, დიპლომატიურ სამსახურში ელჩების დანიშვნა და გათავისუფლება ხორციელდება როტაციის პრინციპით. ასე მოხდა გელა დუმბაძის შემთხვევაშიც. სამინისტრომ საჭიროდ ჩათვალა მისი რესურსის გამოყენება ცენტრალურ აპარატში – საგანაგებო დავალებათა ელჩის პოზიციაზე და მას ჩაბარდება ის სფერო, რომელშიც საქმიანობის დიდი გამოცდილება აქვს. ამის შესახებ ცნობილია თავად გელასთვის და ეს გადაწყვეტილება მიღებული იქნა მასთან კონსულტაციის შედეგად“, – აცხადებენ პრესისა და ინფორმაციის დეპარტამენტში.