თამარ ჩუგოშვილი “ნაციონალურ მოძრაობაზე”: ჩვენ რადიკალურ პარტიასთან გვაქვს ურთიერთობა და ეს უნდა მივიღოთ, როგორც ფაქტი

ტელეკომპანია „იმედის” ეთერში პარლამენტის ვიცე-სპიკერმა, თამარ ჩუგოშვილმა 20-21 ივნისს განვითარებულ მოვლენებზე ისაუბრა. „ჩვენ რადიკალურ პარტიასთან გვაქვს ურთიერთობა და ეს უნდა მივიღოთ, როგორც ფაქტი. მათ ერთი საკითხი აქვთ, თუთიყუშივით, ბიძინა ივანიშვილის სახელის გამეორება და ლანძღვა. და რაც დრო გადის, ეს ძალა კიდევ უფრო რადიკალური და დესტრუქციული ხდება. საარჩევნო თემა იქნება თუ სასამართლო, ფორმატებიც გვაქვს, მოწვეულიც გვყავს, გარბიან შეხვედრებიდან, ან არ მოდიან შეხვედრაზე, როგორღა ვეთანამშრომლობთ?”, – განაცხადა თამარ ჩუგოშილმა. ვიცე-სპიკერმა 20-21 ივნისის დადგენილებაზე ისაუბრა და აღნიშნა, რომ ამ დადგენილების მიზანია, საზოგადოება, ყველა პოლიტიკური ძალა შეთანხმდეს, რომ ქვეყანაში ცვლილებები მხოლოდ არჩევნების გზით უნდა განხორციელდეს და რომ ნებისმიერ შტურმს ან სხვა ძალადობრივი ფორმით ცვლილებების მცდელობას აუცილებლად უნდა გაეცეს პასუხი. „დადგენილებას რაც შეეხება, ერთი მიზანია – მთელი საზოგადოება, ყველა პოლიტიკური ძალა ქვეყანაში უნდა მიეჩვიოს, რომ ქვეყანაში ცვლილებების გზა არის არჩევნების გზა და ნებისმიერ სახელმწიფო ინსტიტუტზე შტურმს და სხვა ძალადობრივი ფორმით ცვლილებების მოტანას ქვეყანაში პოლიტიკური პასუხი უნდა გაეცეს. ეს არის პოლიტიკური შეფასება. პარლამენტის რეზოლუცია და პარლამენტის მიერ მიღებული ასეთი პოლიტიკური აქტი. მიუხედავად იმისა, რომ მას სამართლებრივი რეაგირება არ მოჰყვება, ძალიან დიდი პოლიტიკური დატვირთვა აქვს. მაგალითად, საქართველოს პარლამენტს თავისი რეზოლუციით მიღებული აქვს საგარეო პოლიტიკის ძირითადი მიმართულებები. ეს არის მთავარი განაცხადი ქვეყნის, თუ რა არის მისი საგარეო პოლიტიკის ძირითადი მიმართულებები. იგივეა ეს დადგენილება, ეს არის ქვეყნის საკანონმდებლო ორგანოს განაცხადი”, – განაცხადა ჩუგოშვილმა.