ჩვენი დიდი სურვილია, სწორედ არსებულმა ინვესტორმა განახორციელოს ანაკლიის პროექტი, რადგან ეს არის ქართულ-ამერიკული კონსორციუმი. სტრატეგიულად, გლობალური და ეკონომიკური უსაფრთხოების კონტექსტიდან გამომდინარე, მივესალმებით ამ პროექტში ამერიკულ და ქართულ ინვესტიციას, – ამის შესახებ საქართველოს ვიცე-პრემიერმა მაია ცქიტიშვილმა ანაკლიის პორტის პროექტის შესახებ დასმული შეკითხვის საპასუხოდ განაცხადა.
მისივე თქმით, პროექტი უნდა განახორციელოს „თიბისი-ანაკლია ჰოლდინგმა“ და მისი გაიგივება „თიბისი ჯგუფთან“ ან „თიბისი ბანკთან“, მართებული არ იქნება.
„რაც შეეხება შეკითხვას – აშენდება თუ არა ანაკლიის პორტი, არაერთხელ გაეცა პასუხი, მათ შორის მაღალი ტრიბუნიდან და გავიმეორებ, რომ ეს პროექტი აუცილებლად განხორციელდება იმის მიუხედავად, შეძლებს თუ არა „ანაკლიის განვითარების კონსორციუმი“ წარმატებით გაართვას თავი აღებულ ვალდებულებებს. ჩვენ ვართ დაინტერესებული, რომ ის დრო და ძალისხმევა, რაც მთავრობამ, დონორებმა და კონსორციუმმა ამ საქმეში ჩავდეთ, არ დაიკარგოს და არსებულმა ინვესტორმა წლის ბოლომდე შეძლოს დაფინანსების მოპოვება, ამისთვის კი, პოლიტიკური სპეკულაციებისა და არაკონსტრუქციული პროცესის ნაცვლად, საჭიროა კონსორციუმმა შეასრულოს თავისი ვალდებულებები“, – აღნიშნა მაია ცქიტიშვილმა.