რუსეთია პასუხისმგებელი საქართველოსა და უკრაინის წინააღმდეგ აგრესიაზე – ეს განცხადება ნატოს გენერალურმა მდივანმა გააკეთა. იენს სტოლტენბერგი სიტყვით სიდნეის კვლევით ინსტიტუტში გამოვიდა.
ნატოს გენერალური მდივნის თქმით, ვლადიმერ პუტინს ევროპაში გავლენის სფეროების აღდგენა სურს. სტოლტენბერგის თქმითვე, ნატოს რუსეთისთვის პირობა არ მიუცია, რომ ალიანსში ახალ წევრებს არ მიიღებს.
“ვფიქრობ, რუსეთისა და პრეზიდენტ პუტინის მიზანია, აღადგინოს სისტემა, სადაც გავლენის სფეროები ექნება, სადაც დიდ ძალაუფლებას, რუსეთს შეუძლია, გადაწყვიტოს, რას აკეთებენ მეზობლები ან პირიქით და, რაც ყველაზე სახიფათოა, არის ის, რომ ასეთ სისტემაში პატარა სახელმწიფოები რეალურად არ არიან დამოუკიდებლები და სუვერენულები. ასეთმა სისტემამ ბევრჯერ მიგვიყვანა ომამდე ევროპაში. ასე, რომ რუსეთის იდეა, ჰქონდეს უფლება, გადაწყვიტოს რისი გაკეთება შეუძლიათ მეზობლებს, არის სახიფათო და არღვევს ფუნდამენტურ პრინციპებს, რომლებისაც ნატოს სჯერა. რუსეთს არ მოსწონს იდეა, ჰყავდეს მეზობლები, რომლებიც თავისი სურვილის მიხედვით იქცევიან და რომლებსაც ნატოში გაწევრიანება სურთ. სწორედ ეს არის მიზეზი თუ რატომაა რუსეთი პასუხისმგებელი აგრესიულ ქმედებებზე უკრაინისა და საქართველოს წინააღმდეგ. ყველა ევროპულ ქვეყანას აქვს უფლება, თავად აირჩიოს მომავალი,“ – განაცხადა სტოლტენბერგმა.