„რუსთავი2“-ის ყოფილ გენერალურ დირექტორს ნიკა გვარამიას 40 000 ლარის გირაო შეეფარდა. სასამართლოს 4-საათიანი სხდომის შემდეგ მოსამართლე გიორგი კერატიშვილმა გადაწყვეტილება გამოაცხადა.
გვარამიას ასევე აეკრძალა ქვეყნის საზღვრების დატოვება გამოძიების ინფორმირების გარეშე.
წინასასამართლო სხდომა 30 სექტემბრისთვის ჩაინიშნა. როგორც ცნობილია, პროკურატურა 80 000 ლარიან გირაოს ითხოვდა.
ნიკა გვარამია გირაოს გადახდას არ აპირებს.
გვარამიამ სხდომის დაწყებამდე საქალაქო სასამართლოს ეზოში ჟურნალისტებს განუცხადა, რომ მას აქვს მტკიცებულებები, რომელიც უდანაშაულობას ამტკიცებს და თუ მას ბრალს არ მოუხსნიან, ეს უკვე სასამართლოს პრობლემა იქნება.
რაც შეეხება სასამართლოს მიერ დაკისრებულ კიდევ ერთ ზომას, რომელიც „რუსთავი2“-ის ყოფილი გენერალური დირექტორისთვის ქვეყნის საზღვრების დატოვების აკრძალვას გულისხმობს, გვარამიას თქმით, ეს მის გეგმებს უკავშირდება.
გვარამიამ აღნიშნა, რომ იმ ტელევიზიის ინვესტორები, რომლის დახმარებითაც არხის გახსნას გეგმავს, საზღვარგარეთ იმყოფებიან და მათთან შეხვედრებს ვეღარ გამართავს, ასეთ ინვესტორთა შორის მან ზაზა ოქუაშვილი დაასახელა.