ექსპერტი მამუკა არეშიძე აცხადებს, რომ ვერტმფრენების საქმეს არ იცნობს, თუმცა ახსოვს, 2010 წელს ისრაელის პოლიტიკურ წრეებში კეზერაშვილის გარკვეულ ფინანსურ მაქინაციებში მონაწილეობასთან დაკავშირებით საუბრობდნენ.
არეშიძე ვარაუდობს, რომ საქმე სწორედ ამ ვერტმფრენებს ეხებოდა:
„თვითონ ვერტმფრენების საქმეს არ ვიცნობ, მაგრამ ვიცი სიტუაცია, რომელიც იყო ისრაელში 2010 წელს კეზერაშვილთან დაკავშირებით. მაშინვე იყო საუბარი ისრაელის პოლიტიკურ წრეებში იმის თაობაზე, რომ გარკვეულ ფინანსურ მაქინაციებში ჰქონდა მონაწილეობა მიღებული კეზერაშვილს. რა ტიპის იყო ეს ფინანსური მაქინაციები, ეს უცნობი იყო. როგორც ჩანს, ამ ვერტმფრენებზე იყო ლაპარაკი. ეს რაც შეეხება თვითონ ისრაელს, მაგრამ მაშინ მახსოვს ისრაელის სპეცსამსახურები ეძებდნენ ინფორმაციას კეზერაშვილის იარაღით ვაჭრობაში მონაწილეობასთან დაკავშირებით და მახსოვს, რომ ეს ძებნის არეალი იყო, მაგალითად უკრაინა. რადგან საგამოძიებო უწყების წარმომადგენელი არ ვარ, მიჭირს თქმა ზუსტად, როგორ განვითარდა მოვლენები, მაგრამ კეზერაშვილს წლების განმავლობაში სადაც არ უნდა ყოფილიყო, ევროპაში, მაგალითად ალბანეთში, ალბანეთში ძალიან სერიოზული ბიზნესი აქვს, სათამაშო ბიზნესშია იქ ჩართული და ევროპელ სამართალდამცველებს ხშირ შემთხვევაში ეჭვი შეაქვთ ხოლმე მის საქმიანობაში და აქა იქ გაიჟღერებს ხოლმე იარაღის ვაჭრობასთან დაკავშირებით მისი გვარი“,-განუცხადა „პირველს“ მამუკა არეშიძემ.
ებრაული გამოცემა marker საქართველოს თავდაცვის ყოფილი მინისტრის, დავით კეზერაშვილის შესახებ წერს.
გამოცემის ცნობით, ისრაელის პრემიერ მინისტრის, ბიმიანიმ ნეთანიაჰუს ნდობით აღჭურვილმა პირმა ვალტერ სორიანომ, პოლიციის უფროსის თანამდებობაზე ყოფილი კანდიდატის გალ ჰირშის შუამავლობით, საქართველოს 3 ვერტმფრენი მიჰყიდა.
შეთანხმება 2007 წელს გაფორმდა, როდესაც ჰირში საქართველოს თავდაცვის მინისტრის, დავით კეზერაშვილის მრჩეველი იყო. სტატიაში საუბარია ფარულ ფინანსურ გარიგებებსა და ფულის გათეთრების სავარაუდოდ სქემაზე.