საზოგადოებრივი მაუწყებელი რიოს 2016 წლის ზაფხულის ოლიმპიური თამაშების ტრანსლაციასთან დაკავშირებით განმარტებას აკეთებს.
”გვინდა კიდევ ერთხელ განვმარტოთ, რომ საზოგადოებრივი მაუწყებელი „რიო 2016“-ის ექსკლუზიური ჩვენების უფლების მფლობელია, შესყიდული აქვს სრული პაკეტი OBS-ისაგან, ერთადერთი ოფიციალური გამყიდველისგან, რაც გულისხმობს შემდეგს: მულტისიგნალის მიღებას და ყველა იმ სახეობის ტრანსლირებას, რომელსაც მულტისიგნალი შეიცავს. საზოგადოებრივ მაუწყებელს გადახდილი აქვს სრული პაკეტის საფასური და დამატებითი ღირებულება ყველა ტრანსლაციის მისაღებად, თუმცა საკვალიფიკაციო ეტაპზე მომწოდებელი არ აწარმოებს ყველა ასპარეზობის გადაღებას, შესაბამისად, ზოგიერთი შეჯიბრის სიგნალს არ გვაწვდის.
დამატებით გაცნობებთ, რომ ყოველ საათში პოლიტიკური რეკლამით ჭრა ოლიმპიადის მიმდინარეობისას, სპორტული ტრანსლაციების დროს გამოწვეულია საზოგადოებრივი მაუწყებლის ვალდებულებით კანონის წინაშე. კერძოდ, საქართველოს ორგანული კანონის „საქართველოს საარჩევნო კოდექსის“ 50-ე და 51-ე მუხლების, ასევე, „მაუწყებლობის შესახებ“ საქართველოს კანონის 32-ე მუხლის მე-7 პუნქტის და სსიპ „საზოგადოებრივი მაუწყებლის“ დებულების მე-5 მუხლის 5.3.2. საფუძველზე, საზოგადოებრივი მაუწყებელი ვალდებულია მიმდინარე საარჩევნო კამპანიის დროს ყოველ საათში 5 წუთი გამოყოს წინასაარჩევნო რეკლამის უსასყიდლოდ განსათავსებლად და ყოველ 3 საათში თანაბრად და არადისკრიმინაციულად განათავსოს თითოეული კვალიფიციური საარჩევნო სუბიექტის მიერ წარდგენილი წინასაარჩევნო რეკლამა. პოლიტიკური რეკლამის განთავსება ხდება პოლიტიკური პარტიების მომართვის საფუძველზე, საზოგადოებრივ მაუწყებელს არ აქვს უფლება არ შეასრულოს კანონით მასზე დაკისრებული ვალდებულება და უარი უთხრას პოლიტიკურ პარტიას რეკლამის განთავსებაზე. სწორედ კანონით დაკისრებული ვალდებულებების შესრულების გამო უწევს ჩვენს მაყურებელს ოლიმპიადის მსვლელობისას ყოველ ასტრონომიულ საათში უფასო პოლიტიკური რეკლამის ყურება.
საზოგადოებრივი მაუწყებლის გუნდი თავდაუზოგავად მუშაობს იმისათვის, რომ ყველა ჩამოთვლილი, ჩვენგან დამოუკიდებელი მიზეზის გათვალისწინებით მაქსიმალურად უზურუნველყოს იმ ასპარეზობების ტრანსლაცია, რომლებსაც მაყურებელი ელოდება”, -ნათქვამია განცხადებაში.