ვარკეთილში, მე-9 სართულიდან გადავარდნილი 16 წლის ბიჭის მიმართ ჯგუფურად ჩადენილი ძარცვის ბრალდებით დაკავებულების საქმის პროკურორის, ნათია ქომოშვილის განცხადებით, ბრალდებულთა ბრალეულობას არაერთი უტყუარი მტკიცებულება ადასტურებს.
„გამოძიების ეტაპზე არაერთი უტყუარი მტკიცებულება იქნა მოპოვებული, რომელიც დასაბუთებული ვარაუდის სტანდარტით ადასტურებს მოცემულ საქმეზე ბრალდებულ პირთა მიერ დანაშაულის ჩადენას. თუმცა, გამოძიების ინტერესებიდან გამომდინარე, ამ ეტაპზე, მტკიცებულებებზე ვერ გესაუბრებით.
არაერთი პირდაპირი მოწმეა, რომლებიც ადასტურებენ მოცემულ საქმეზე ბრალდებულ პირთა მიერ დანაშაულის ჩადენას. რაც შეეხება თვითმკვლელობამდე მიყვანის ფაქტს, გამოძიება გრძელდება. ამ კუთხით დაკავებულებს ბრალი არ აქვთ წარდგენილი”, – განაცხადა ქომოშვილმა.
დაკავებული 6 პირიდან ორი არასრულწლოვანია.
აღნიშნულ საქმეზე თბილისის საქალაქო სასამართლოში 5 პირისთვის აღკვეთის ღონისძიების შეფარდებაზე დღეს იმსჯელებენ. სულ საქმეზე დაკავებულია 6 პირი, თუმცა ერთ-ერთ მათგანს, რომელიც სრულწლოვანია, სხვა საქმეზე აღკვეთი ღონისძიება უკვე შეფარდებული აქვს. დაკავებულებიდან ბრალს არც ერთი აღიარებს.
შსს-ს ინფორმაციით, გამოძიებით დადგინდა, რომ ბრალდებულებმა მიმდინარე წლის 23 სექტემბერს, ვარკეთილის მე-3 მასივში, 2003 წელს დაბადებულ გ.ყ.-ს მეგობრების თანდასწრებით სიტყვიერი შეურაცხყოფა მიაყენეს და დამამცირებელ გარემოებაში, ძალის გამოყენებით წაართვეს მობილური ტელეფონი. აღნიშნული ფაქტის შემდეგ არასრულწლოვანმა თავი მოიკლა.
გამოძიება მიმდინარეობს ძარცვის ფაქტზე, რამაც მნიშვნელოვანი ზიანი გამოიწვია, ასევე, თვითმკვლელობამდე მიყვანის, ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარების ფაქტებზე, საქართველოს სსკ-ის 178-ე მუხლის მე-2 ნაწილის „ა“ ქვეპუნქტით და მე-3 ნაწილის „ბ“ ქვეპუნქტით, 115-ე მუხლის 1-ლი ნაწილით და 236-ე მუხლის მე-3 და მე-4 ნაწილებით