ნინო ბურჯანაძე მეთიუ ბრაიზას განცხადებას პასუხობს

,,მეთიუ ბრაიზა კვლავ აცოცხლებს ნატოს ყოფილი გენერალური მდივნის რასმუსენის იმ იდეას, რომელიც კვიპროსის მოდელით საქართველოს ნატოში გაწევრიანებას გულისხმობს.
თუ ასეთი მეგობრები არიან და ასე შესტკივათ გული საქართველოზე, მაშინ როგორც კვიპროსი მიიღეს ევროკავშირში, ასე მიგვიღონ ჩვენც ევროკავშირში, რაც მნიშვნელოვანი წინგადადგმული ნაბიჯი იქნება საქართველოსთვის”. – აცხადებს ,,ერთიანი საქართველო-დემოკრატიული მოძრაობის” ლიდერი ნინო ბურჯანაძე.
ნინო ბურჯანაძე იმ პოლიტიკოსებს მოუწოდებს, რომლებიც აჟიტირებულები არიან ნატოში გაწევრიანების იდეით და თავაზობს ყურადღებით წაიკითხონ მეთიუ ბრაიზას განცხადება, სადაც ორი გზავნილი იკვეთება.
,,რატომ არ არის კვიპროსი ნატოს წევრი დღემდე, როდესაც მის ტერიტოტიაზე ნატოს ორი წევრი ქვეყნის, დიდი ბრიტანეთის და თურქეთის რესპუბლიკის ბაზებია განლაგებული? ე.ი. ამას თავისი გარკვეული მიზეზები ჰქონდა.
რაც შეეხება მეთიუ ბრაიზას 2 გზავნილს – ის ამბობს, რომ ეს გადაწყვეტილება საქართველოს დაკარგულ ტერიტორიებს არ დაუბრუნებს და მეორე ის ამბობს, რომ მომავალში აუცილებლად გამოჩნდებიან რუსეთის გავლენის ქვეშ მყოფი ევროპელი პოლიტიკოსები, რომლებიც ზეწოლას მოახდენენ და საქართველოს უარს ათქმებინებენ აფხაზეთზე და სამაჩაბლოზე. ბრაიზაც კი ვერ მალავს იმ საფრთხეებს, რომელიც ამ გადაწყვეტილების უკან დგას.
კიდევ ერთხელ ვიმეორებ, აფხაზეთში და სამაჩაბლოში მე-5 მუხლის გავრცელების გარეშე გაწევრიანება, ამ ტერიტორიებზე სამუდამოდ უარის თქმას ნიშნავს.
მოვუწოდებ ყველას, ვინც აჟიტირებულია ნატოს წევრობით კარგად დაფიქრდით, ამ საკითხზე ნებისმიერი სერიოზული დისკუსია არის გზავნილი როგორც რუსეთისათვის, ასევე აფხაზებისა და ოსებისთვის და გზავილია დასავლეთისთვისაც.
ჩვენ სერიოზულ სარისკო ნაბიჯებს ვდგამთ ასეთი დისკუსიის დაწყებითაც კი, რაც ჩემი აზრით არის ქვეყნის ინტერესების ღალატი და ამას ჩვენ მომავალი თაობები არ გვაპატიებენ.” -აცხადებს ნინო ბურჯანაძე.