ულვაშიანო კაცო გაჩუმდი და წყნარად მომისმინე,- ასე მიმართა ემზარ კვიციანმა ფრაქცია „ერთიანი ნაციონალური მოძრაობის“ თავმჯდომარე რომან გოცირიძეს.
„პატრიოტთა ალიანსის“ წევრმა აღნიშნული სიტყვები იურიდიულ საკითხთა კომიტეტის სხდომაზე, უზენაესი სასამართლოს მოსამართლეობის კანდიდატის, ლალი ფაფიაშვილის მოსმენის დროს თქვა, რა დროსაც მის კითხვას გოცირიძისგან რეპლიკა მოჰყვა.
„დამნაშავე ყოფილი პრეზიდენტი და ყოფილი ლიდერი გვყავს, რომელიც თავის პოლიტიკურ პარტიას კარნახობს და ყოველდღიურ რეჟიმში პირდაპირი ეთერით ელაპარაკება აქ. ჩემთან ტელეფონით საუბრის გამო, რადგან მე მაშინ დამნაშავედ გამხადეს, ირაკლი ბათიაშვილი იხდიდა სასჯელს. შვიდი წელი მიუსაჯეს სხვათაშორის. ვნახეთ, რომ გაამართლა სტრასბურგმა. ერთი ასეთი კითხვა მაქვს თქვენთან, სტრასბურგმა ირაკლი ბათიაშვილი რომ გაამართლა, მეც ხომ გამამართლა? ანუ, ჩვენი საუბარი გაამართლა. გაამართლა ის, რომ ჩემი და ირაკლის საუბარი გაყალბებული იყო. ირაკლის ვუთხარი, რომ აფხაზებმა შემომთავაზეს დახმარება, მაგრამ მე უარი ვუთხარი. მეც შევთავაზე დახმარება, როცა არეულობა გვქონდა, მაგრამ ეს ფორმალური შეთავაზება იყო. ეს ყველაფერი უცხო ქვეყნის სპეცსამსხურების დავალებით შემოგვიტრიალეს სააკაშვილმა და მისმა ბანდამ, რომლის წარმომადგენელიც აგერ უკან მიზის“, – განაცხადა ემზარ კვიციანმა.
დეპუტატის ამ განცხადების შემდეგ, რომან გოცირიძემ „პატრიოტთა ალიანსის“ წევრს ხუმრობით ჰკითხა ახსოვდა თუ არა ვინ იყო შავი კაცი ფილმ „შერეკილებიდან“.
„შავი კაცი? შენ ამას ვერ გაიგებ ვინ იყო ის შავი კაცი, რადგან შენ სამხედრო არ ხარ და არასდროს დაგიცავს შენი სამშობლო. ამიტომ, ულვაშიანო კაცო, გაჩუმდი და წყნარად მოისმინე.“- მიმართა კვიციანმა გოცირიძეს.