„ზელიმხან ხანგოშვილი იყო მკვლელი, ასეთი ადამიანი თავისუფლად სეირნობდა ერთ-ერთ ევროპულ დედაქალაქში“, – ამის შესახებ რუსეთის პრეზიდენტმა, ვლადიმერ პუტინმა ყოველწლიურ პრესკონფერენციაზე განაცხადა.
“კიდევ ერთხელ შეგახსნებთ, რაც ვთქვი პარიზში, პრესკონფერენციის დროს. ის იყო სისხლიანი მკვლელი. კავკასიაში მხოლოდ ერთ აქციაზე მან 98 ადამიანი მოკლა. დაფიქრდით, ამ ციფრზე. ის მონაწილეობდა მოსკოვის მეტროს ტერაქტის ორგანიზებაში და ეს სრული ჩამონათვალი არ არის“, – განაცხადა ვლადიმერ პუტინმა. მისივე თქმით, რუსეთმა ხანგოშვილის საკითხი საკითხი სპეცსამსახურების დონეზე არაერთხელ დააყენა.
„ჩვენ ვხედავთ, რომ ეს ხალხი, ტერორისტები თავისუფლად დასეირნობენ ევროპის დედაქალაქებში. რამდენადაც ვიცი, ის პირდაპირ ბერლინის ცენტრში მოკლეს. აი, ასეთი ადამიანი თავისუფლად სეირნობდა ერთ-ერთ ევროპულ დედაქალაქში. თქვენ მისცემთ უფლებას, ასეთმა ადამიანებმა თავისუფლად ისეირნონ ქუჩებში? იმისთვის, რომ ეს არ მოხდეს, აუცილებელია, ერთობლივი, მაღალექფექტიანი მუშაობა. თავის დროზე ჩვენ ამერიკელები გავაფრთხილეთ ცარნაევზე, თუ რა ერქვა, ვაფრთხილებდით, გადმოცემაც ვთხოვეთ, ვეუბნებოდით, რომ ის საფრთხეს წარმოადგენდა. დაგვაიგნორეს, შემდეგ კი, მან ბოსტონში ტერაქტი მოაწყო“, – განაცხადა ვლადიმერ პუტინმა.
შეგახსენებთ, საქართველოს მოქალაქე, 40 წლის ზელიმხან ხანგოშვილი გერმანიის დედაქალაქში 23 აგვისტოს მოკლეს. 4 დეკემბერს გერმანიამ ორი რუსი დიპლომატი გააძევა. მიზეზად ზელიმხან ხანგოშვილის მკვლელობა დაასახელეს. გერმანიის მთავრობა მიიჩნევს, რომ აღნიშნულ მკვლელობასთან რუსეთის ხელისუფლებაა დაკავშირებული. რუსეთში ამ ბრალდებას უარყოფენ.