ირანის ხელისუფლებამ განაცხადა აშშ-ის ტრანსპორტირების უსაფრთხოების ნაციონალურ საბჭოს(NTSB) შესთავაზა მისი წარმომადგენლის მონაწილეობა „უკრაინის საერთაშორისო ავიახაზების“ თვითმფრინავის კატასტროფის მიზეზთა გამოძიებაში.
თეირანის ამ გადაწყვეტილებას წინ უძღოდა აშშ-ის, კანადის და დიდი ბრიტანეთის ოფიციალური წარმომადგენლების განცხადებები, რომ სამგზავრო თვითმფრინავი სავარაუდოდ, შეცდომით ჩამოაგდეს ირანული რაკეტით. თეირანი ამას უარყოფს და დასავლეთის სახელმწიფოებს მოუწოდებს, ნებისმიერი ინფორმაცია, რომელსაც ფლობენ, ირანის შესაბამის სამსახურებს გადასცენ.
ირანის სამოქალაქო ავიაციის ორგანიზაციის ხელმძღვანელის, ალი აბედზადეს ინფორმაციით, NTSB-ის და ავიამშენებელი კომპანიის, „ბოინგის“ წარმომადგენლების გარდა, გამოძიებაში მონაწილეობას სთავაზობენ უკრაინის, კანადის და საფრანგეთის ექსპერტებს.
გაეროს წესებით, NTSB-ს უფლება აქვს მონაწილეობა მიიღოს გამოძიებაში, რადგან თვითმფრინავი „ბოინგი“დაპროექტებული და აწყობილია აშშ-ში.
ამერიკულმა მხარემ დაადასტურა, რომ ირანისგან შეთავაზება მიიღო და წარმომადგენელიც უკვე დანიშნა. ამასთან, სააგენტო Reuters-ს ინფორმირებულმა წყარომ უთხრა, რომ ირანის წინააღმდეგ აშშ-ის სანქციების პირობებში გაუგებარია, როგორ შეძლებს მუშაობას NTSB-ის წარმომადგენელი.
“უკრაინის საერთაშორისო ავიახაზების” სამგზავრო „ბოინგი 737,“ რომელიც თეირანი-კიევის რეისს ასრულებდა, 8 იანვარს, აფრენიდან მალევე ჩამოვარდა თეირანის აეროპორტის მახლობლად.
თვითმფრინავში იმყოფებოდა ეკიპაჟის 9 წევრი და 167 მგზავრი. ყველა მათგანი დაიღუპა – უკრაინის 11, ირანის 82, კანადის 63, შვედეთის 10, ავღანეთის 4, გერმანიის 3 და დიდი ბრიტანეთის 3 მოქალაქე.
ირანული მხარის პირველადი ვერსიით, კატასტროფა ძრავში გაჩენილმა ხანძარმა გამოიწვია. „უკრაინის საერთაშორისო ავიახაზები“ აცხადებს, რომ თვითმფრინავი სრულ წესრიგში იყო და მას გამოცდილი ეკიპაჟი მართავდა.
ავიაკატასტროფამდე რამდენიმე საათით ადრე, ირანმა სარაკეტო იერიში განახორციელა ერაყის ბაზებზე, სადაც ამერიკელი სამხედროები იმყოფებიან.