“დიდი სურვილი გვაქვს, რომ მეტს ჰქონდეთ სახლები, სურსათი, ტანსაცმელი”

სრულიად საქართველოს კათოლიკოს-პატრიარქი ილია II საქართველოს საპატრიარქოსთან არსებულ მოწყალების სახლს ეწვია.

უწმინდესმა დაწესებულების ბენეფიციარები და შემომწირველები დალოცა და დაასაჩუქრა, მოწყალების სახლის ხელმძღვანელ მზია კაცაძეს, კი გაწეული მრავალწლიანი შრომისთვის მადლობა გადაუხადა.

„მე მინდა მადლობა ვუთხრა ქალბატონ მზიას. ის რასაც აკეთებს წლების განმავლობაში ვერ გააკეთებდა სხვა ადამიანი, მაგრამ ღმერთმა მისცა ძალა და მადლი. ის ადამიანები რომლებიც სწირავთ შესაწირავს ღმერთმა შეგიწიოთ ღმერთმა დაგლოცოთ, ღმერთი იყოს თქვენი მფარველი. ბევრს შრომობთ და ღმერთი დაგიფასებთ ამას. მე მინდა დავლოცო ადამიანები, რომლებიც საზრდოობენ აქედან. ჩვენ დიდი სურვილი გვაქვს, რომ მეტს ჰქონდეთ სახლები, თქვენი ოჯახები უზრუნველყოფილი იყოს ტანსაცმლით, სურსათით, მაგრამ ასეთი დროა რთული დროა და იმედია, რომ საქართველო გაძლიერდება, იმედია, რომ გამდიდრდება საქართველო და აღარ გვექნება საჭიროება, რომ დახმარება გავუწიოთ. ყველას დაგირიგდებათ პატარა საჩუქრები საჭმელის სახით“, – თქვა ილია მეორემ.

საქართველოს საპატრიარქოსთან არსებული მოწყალების სახლი 1994 წლიდან ყოველდღიურად 200-მდე გაჭირვებულ ადამიანს ეხმარება, განსხვავებული ეროვნებისა თუ რელიგიური მრწამსის მიუხედავად, აქ ყველა თანაბრად იღებს თანადგომას.