ირანის პრეზიდენტი, ჰასან როჰანი გამოვიდა ეროვნული ერთიანობის მოწოდებით, იმ ფონზე, როცა გრძელდება საპროტესტო გამოსვლები ერთი კვირის წინ, ირანის საჰაერო თავდაცვის ძალების მიერ უკრაინული სამგზავრო თვითმფრინავის ჩამოგდების გამო.
როჰანიმ ტელევიზიით გადაცემულ გამოსვლაში მოქალაქეებს სიმშვიდისკენ მოუწოდა. პარალელურად, ირანის საგარეო საქმეთა მინისტრმა, მოჰამად ჯავად ზარიფმა ინდოეთში მიმდინარე კონფერენციაზე განაცხადა, დემონსტრაციები იმიტომ იმართება, რომ ხალხს რამდენიმე დღის განმავლობაში ატყუებდნენო.
„ხალხს უნდა, მთავრობა მას მოექცეს გულწრფელად, პატიოსნად და ნდობით“, – თქვა როჰანიმ და შეიარაღებულ ძალებს მოუწოდა, ბოდიში მოიხადონ და დეტალურად ახსნან, რა მოხდა ტრაგედიის დროს.
თვითმფრინავი თეირანიდან აფრენის შემდეგ ჩამოაგდეს 8 იანვარს, რასაც ბორტზე მყოფი 176-ვე ადამიანი ემსხვერპლა. დაღუპულების უმრავლესობა ირანის და კანადის მოქალაქეები იყვნენ. კატასტროფა მოხდა მაშინ, როცა ირანის საჰაერო დაცვის ძალები გაძლიერებულ რეჟიმზე იყვნენ გადასული, მას შემდეგ, რაც ირანმა რამდენიმე საათით ადრე ბალისტიკური რაკეტებით მიიტანა იერიში აშშ-ის ძალებზე ერაყში.
ირანში ყოველდღე იმართება გამოსვლები 11 იანვრიდან, ანუ მას შემდეგ, რაც ქვეყნის არმიამ აღიარა, რომ თვითმფრინავი შემთხვევით იქნა ჩამოგდებული რაკეტით.