ვახტანგ გომელაურმა ჟურნალისტებთან ფარული კადრების საქმეზეც გააკეთა კომენტარი.
“ამ საქმეს პროკურატურა იძიებს, შინაგან საქმეთა სამინისტროც მუშაობს ამ მიმართულებით და ჩვენც ჩართულები ვართ. ტექნიკურად ვეხმარებით, ოპერატიულ გადაფარვას ვაკეთებთ. თუ საჭირო გახდება ამ საქმეზე პროკურატურა გააკეთებს კომენტარს, გამოძიებიდან გამომდინარე მე თავს შევიკავებ. “-განაცხადა ჟურნალისტებთან ვახტანგ გომელაურმა.
სახელმწიფო უსაფრთხოების სამსახურის უფროსმა ჟურნალისტებთან ე.წ. ოდეერებზეც ისაუბრა და განაცხადა, რომ უნივერსიტეტში არანაირი ოდეერები არ არსებობენ.
მისი თქმით, არსებული კანონით და მისი ერთპიროვნული გადაწყვეტილებით არ ხდება უსაფრთხოების ოფიცრების გამწესება.
როგორც გომელაურმა აღნიშნა, პარლამენტის მიერ 25 ობიექტი იყო დამტკიცებული, სადაც უნდა მივლენილიყვნენ უსაფრთხოების ოფიცრები, მისი თქმით, აქედან სახელმწიფო უსაფრთხოების ოფიცერი 12 ობიექტში ჯერ კიდევ არაა დანიშნული.
„უნივერსიტეტებში არანაირი „ოდეერები“ არ არსებობენ, „ოდეერები“ იყვნენ, სანამ გამოეყოფოდა შინაგან საქმეთა სამინისტროს სახელმწიფო უსაფრთხოების სამსახური, ოფიციალურად, რა თქმა უნდა, კანონის ფარგლებში, თუმცა ამ კანონის მიღებიდან „ოდეერების“ სამსახური გაუქმდა ავტომატურად. შეირჩა 25 ობიექტის, ჩვენი რეკომენდაციით, ეს პარლამენტმა დაამტკიცა. ამ თემაზეც მინდოდა საუბარი პარლამენტის ტრიბუნიდან, 25 სუბიექტიდან ჯერ 13 ობიექტში არის დანიშნული ჩვენი ე.წ. სახელმწიფო უსაფრთხოების ოფიცერი, 12-ში – ჯერ კიდევ არა. ამიტომ ეს არ წყდება ერთპიროვნულად, ადრე წყდებოდა მინისტრის ბრძანებით, ახლა ჩემი ბრძანებით არ წყდება, თუ ორმხრივი მოლაპარაკება არ არის და ორმხრივი თანხმობა არ იქნება ჩვენი სამსახურის და იმ ობიექტის – ეს იქნება სამინისტრო ან რომელიმე სტრუქტურა. აქედან გამომდინარე, ჯერ ასეა, 25 სუბიექტზეა პარლამენტისგან დამტკიცებული. არის ბევრი საუბარი, მინდა აღვნიშნო, თუ პარლამენტი მიიღებს კანონს და გააუქმებს ამ თემას, კანონს, რასაც მიიღებს პარლამენტი, ჩვენ შევასრულებთ. ცუდი იქნება, თუ კარგი იქნება, შეიძლება ყველაფერი არ მოგვწონდეს ჩვენ, თუმცა კანონი კანონია, საკანონმდებლო ორგანო, რასაც მიიღებს, ჩვენ მზად ვართ, ის შევასრულოთ“, – განაცხადა ვახტანგ გომელაურმა.