იტალიაში ბოლო 24 საათის განმავლობაში კორონავირუსით 2 ადამიანი დაიღუპა. ამის შესახებ გამოცემა The Sun იტყობინება.
გავრცელებული ინფორმაციით, მას შემდეგ რაც ქალაქ პადუაში კორონავირუსით 77 წლის კაცი გარდაიცვალა, ლომბარდიის რეგიონში ექიმებმა დაინფიცირებული ქალის გადარჩენა ვერ შეძლეს. კიდევ ერთი პაციენტის მდგომარეობა კრიტიკულია. სულ იტალიაში კორონავირუსით ინფიცირების 30 შემთხვევაა გამოვლენილი.
ბოლო მონაცემებით, ჩინეთში დაავადებულთა რაოდენობა 76 288-ს შეადგენს, კორონავირუსს კი უკვე 2 345 ადამიანი ემსხვერპლა. ამასთან ერთად, ჩინეთის საზღვრებს გარეთ, 26 სახელმწიფოში უკვე 1 200-ზე მეტი შემთხვევა დაფიქსირდა, დაღუპულთა რაოდენობამ კი 8-ს მიაღწია.
30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.
მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.