საერთაშორისო სავალუტო ფონდი და მსოფლიო ბანკი მზად არიან იმ ქვეყნებს დაეხმარონ, რომელთა ეკონომიკა კორონავირუსის გამო დაზარალდა.
ამის შესახებ ნათქვამია საერთაშორისო სავალუტო ფონდის განცხადებაში.
„საერთაშორისო სავალუტო ფონდი და მსოფლიო ბანკი მზად არიან დაეხმარონ ჩვენს წევრ ქვეყნებს დასძლიონ კორონავირუსით გამოწვეული ადამიანური ტრაგედია და ეკონომიკური ზარალი. ჩვენ აქტიურად ვმუშაობთ საერთაშორისო დაწესებულებებთან და განსაკუთრებულ ყურადღებას ვუთმობთ ღარიბ ქვეყნებს, სადაც ჯანდაცვის სისტემები ყველაზე სუსტია, ხოლო მოსახლეობა კი დაუცველი. ყველა ჩვენს ხელმისაწვდომ ინსტრუმენტს გამოვიყენებთ, მათ შორის გადაუდებელ დაფინანსებას, პოლიტიკის საკითხებზე რჩევებს და ტექნიკურ დახმარებას“, – ნათქვამია განცხადებაში.
კერძოდ, საერთაშორისო სავალუტო ფონდი და მსოფლიო ბანკი სწრაფი ფინანსირების მექანიზმების გამოყენებას გეგმავს, რაც ქვეყნებს დაეხმარება გააძლიერონ ეპიდემიური ზედამხედველობის ეროვნული სისტემები და საპასუხო ზომები მიიღონ, რათა შეაკავონ მოცემული და ნებისმიერი სხვა სამომავლო ეპიდემია.
ბოლო კვირის განმავლობაში მსოფლიოს 500 უმდიდრესი ადამიანის ქონება 444 მილიარდი დოლარით შემცირდა. ამის შესახებ Bloomberg-ი წერს.
30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.
მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.